香港貴為「購物天堂」，名店開到通街都係，而且好多人都好捨得花錢買名牌時裝、手袋同埋手錶，大拿拿幾萬蚊買番黎都可能喺街同好多人撞款，可想而知香港人消費力幾咁驚人！
不過你又知唔知道，近年消費文化已經開始出現變化，好多人唔再願意花大量金錢裝身，但又唔想犧牲產品質素，所以輕奢侈品牌就漸漸殺出一條血路，喺龐大嘅消費品市場分一杯羹。話明叫「輕奢侈」，呢啲品牌價錢一定唔夠速食時裝平，但係勝在款式特別、有個性，而且質素仲媲美傳統奢侈品牌𠻹。今次就同大家介紹10個輕奢侈時裝、手袋、手錶品牌，一齊發掘新寵啦！
Reformation
Reformation係來自美國嘅女裝品牌，創立短短幾年已經吸引好多荷里活明星歌手青睞。品牌主打法式田園風格嘅時裝，宗旨係設計出又靚又環保嘅衣服，仲話「唔著衫係最符合可持續發展嘅選擇，而佢哋就係第二」喎。品牌會喺每一件衣服嘅介紹清楚說明佢哋比傳統製衣用少幾多水，少幾多碳排效等等。買衫之餘仲可以支持環保！
Linjer
Linjer呢個品牌喺2014創立，目前有賣手錶同皮革手袋。呢個start-up祟尚極簡主義，產品設計簡單大方，絕無花巧。創辦人有感市面上高質素嘅手錶同皮革手袋動輒都要幾萬蚊，平價品牌雖然冇咁傷荷包，但係質素就好參差，仲非常唔耐用。於是佢哋就自己創立品牌，產品選用上等皮革同瑞士錶芯，但價錢就比奢侈品牌平幾個零。
A.P.C.
提起法國，好多人都會自然諗起一個個唔識讀嘅奢侈品牌。其實，好多法國人都表示佢哋係唔會買奢侈品架。A.P.C. 呢個來自巴黎嘅品牌就受到好多法國人鍾情，因為佢哋最愛就係經典同簡約嘅打扮，而且唔中意擺大大個logo喺身，同品牌嘅宗旨不謀而合。A.P.C.最出名嘅就係牛仔單品，永遠唔會過時 。
Junghans Max Bill Collection
網上曾經有句說話，講有錢人嘅「左手伸一伸，貴過你全身。」咁又唔出奇呀，奢侈品牌嘅手錶閒閒地十萬，真係唔係普通人負擔得起。 Junghans係德國最大嘅鐘錶廠，品牌推出嘅Max Bill Collection價錢非常友善，只需幾千蚊就可以買到媲美奢華系列嘅手錶。Carousell仲有好新淨嘅二手款式㖭！
Sophie Hulme
Sophie Hulme係一個英國設計師，佢嘅同名手袋品牌宣稱唔會隨波逐流，亦唔會擺logo喺手袋上面。設計師設計手袋時運用咗好多特別嘅英倫元素，亦好著重手袋嘅結構同材質，係好多歐美明星嘅新寵兒。
Strathberry
Strathberry 可以話係今年爆紅嘅品牌。英國王妃嘅裝扮不嬲都係世界焦點，王妃每次出席公開活動，傳媒都會大肆報導佢嘅一身打扮。啱啱成為王妃嘅Meghan Markle就一手捧紅呢個蘇格蘭品牌喇，自從佢拎過Strathberry嘅手袋出街，佢哋就賣到全線斷貨，一袋難求！雖然貴為王妃，但Strathberry手袋幾千蚊就有交易，而且設計高貴，用料上乘，難怪咁多人要跟從王妃買個番屋企啦。
Manu Atelier
Manu Atelier嘅手袋近年喺社交平台曝光率極高，而且好多時尚icon都拎過出街。呢個品牌來自土耳其，係家族生意，兩姊妹負責設計，而喺皮具產業打滾多年嘅爸爸就負責製作。Manu Atelier嘅手袋採用長方形設計，顏色選擇應有盡有，所以十分鮮明突出。最重要係手袋雖然係手工製造，但價錢依然親民，所以推出至今都係大受歡迎。
Staud
洛杉磯品牌Staud擁有時裝同手袋系列，行復古路線。品牌嘅水桶袋成功俘虜各大歐美網紅嘅心，一直都係ig常客。佢哋嘅設計經典得黎帶些少玩味，款式易襯之餘不失個性，最重要就係產品大多數都係千幾蚊左右，多手買多幾件都唔會太肉赤。
Yuzefi
Yuzefi係來自倫敦嘅品牌，創立咗短短兩年已經進駐大型高級百貨公司，實在唔可以睇小。佢哋手袋主打喺倫敦手造， 活用皮革同金屬，而且用方形設計，十分型格，品牌個性突出。呢個品牌主打細袋，的的骰骰。
AYR
好多女士都會成日煩惱去邊度買番工衫。市面上好多女裝番工衫都太過正經，睇上去十分沉悶。AYR嘅品牌名稱指All Year Round，即係全年都啱著，唔洗擔心換季。AYR嘅時裝簡約高雅，舒適大方，除咗番工，放假嘅時候著唔會太正經，咁就唔洗番工放假衫分開買啦。
認識完呢十個品牌，係咪發覺高級都唔一定係貴得嚇親人呢？呢類輕奢侈品牌質素有保證之餘價錢又親民好多，非常值得入手！
