創業對你嚟講好似遙不可及？機會真係只留俾有機會嘅人？ViuTV劇集《IT狗》當中有一句說話：「如果所有人只做擅長嘅嘢，無人做想做的嘅事，呢個世界或者會更有效率，但就一定唔會變得更好。」
只要肯去嘗試做自己想做嘅事，加上專業嘅支援，完整嘅資料搜集，踏出創業第一步就會更容易。以下四招助你更容易開展創業家之路！
1. 一個可行嘅創業Idea
如果你已經有一個完整可行嘅Idea，恭喜你，你已經成功踏出創業第一步！正所謂「萬事起頭難」，只有你可以將你已有嘅想法「加工」一下，咁你就有一個清晰嘅目標啦！如果你暫時未有Idea，或者只係有一個好初步嘅想法，唔好咁易放棄！係日常生活中多啲留意身邊嘅事物，親人朋友嘅需要，話唔定可以諗到一個好嘅創業Idea呢！
一個好嘅創業Idea必須具備以下嘅元素：幫助到用家解決困難或者令生活更方便；其次就係要有一個可行嘅營收模式，咁先可以解決到長遠發展嘅資金問題。除此之外，創業路上可能會遇到好多挫折，如果有一位志同道合嘅拍擋同你一齊行，必定可以走得更遠。
2. 充足嘅資源
資源其實唔單止係講緊金錢方面，更重要嘅係你嘅經驗、學歷、時間、精神同毅力等等。如果你嘅專業知識同你嘅創意內容有關係，咁你嘅創業之路可能會容易啲！反之，如果你需要其他行業嘅專業知識，例如，Peter係一個Marketing Professional，佢想整一個App，佢就需要一個App developer幫佢寫Code啦。市場上其實都有好多專業人士會接Freelance 或提供outsource服務，用呢個合作模式可以幫你節省資源同時又可以得到你想要嘅skillsets，一舉兩得！
3. 令概念被「孵化」嘅地方
要令你嘅Idea由天馬行空變成一個事業，你需要一個「孵化」嘅地方。香港其實有好多支持年輕人創業嘅計劃，例如係香港科技園嘅香港創業培育計劃（HKSTP INCUBATION），旨在幫助科技相關嘅創業公司發展創新解決方案，並提供共享辦公室俾初創公司開展佢哋嘅事業。
如果你嘅公司同科技無關都唔緊要㗎，香港都有好多共享空間（Coworking Space）可以租用。共享空間除咗可以節省租用辦公室嘅成本，仲可以提供一個Networking嘅機會，同各行各業人士交流！加上近年在家工作（Work from Home）成為咗新常態，選擇共享空間絕對係好選擇！
4. 市場營銷策略
萬事俱備，你只欠一個機會！創業除咗要有一個好嘅產品，更重要嘅係提高產品嘅知名度。試諗下，一件幾好嘅產品如果無人認識，唔單止掙唔到錢，更重要係開發者嘅心血都會白費。機會係絕對需要把握，香港其實有好多創業比賽，例如阿里巴巴JUMPSTARTER、前海創賽比賽等。參加除咗提供一個機會令初創公司提高知名度，拓展人脈之外，更有機會得到投資者嘅青睞，令公司有更多資源去發展！
除此之外，公司嘅Marketing都要做好，例如係經營公司Social Media等。如果無呢方面嘅知識，不妨試下搵幫手啦！香港都有好多市場營銷達人，提供全方位嘅市場營銷計劃，提升Start-up各方面嘅軟實力！
