見工最大嘅惡夢不外乎就係遇到好難答嘅問題，一時俾人問到口啞啞。想做好心理準備知道面試官會問咩？放心啦！我哋搜集咗六大常見面試問題，逐條教大家點樣拆解！
1. 請你自我介紹一下。
其實面試官都係想打開話題，睇下你嘅性格適唔適合個職位，亦都想知道你有冇份工需要嘅技術。大家應該準備一段自我介紹，內容應該包括你申請呢份工作嘅原因，同埋點解你係職位嘅最佳人選，記得要用適當例子闡述。例如你in緊一份時裝界工作，咁就可以講吓你平時鍾意咩style，睇咩時裝雜誌，近排留意緊有咩trend之類。
2. 點解你想加入我哋公司？
面試官咁問其實都係想知道你對份工有幾認真，畢竟冇人想浪費時間喺連功課都唔做吓嘅人身上。如果你連公司嘅基本背景都答唔出，唔洗審人哋都知你冇心做份工啦。千其唔好睇小資料搜查呢一步，你要做嘅嘢包括了解公司歷史、最新動向，甚至係面試官嘅背景資料。呢方面Google同LinkedIn都會幫到大家。
你應該嘗試將自己同公司拉上聯繫，了解人哋公司嘅公司宗旨、願景、文化、營運，同埋主要業務範疇。你要把握機會表現出你同公司嘅想法同願景吻合，認同公司嘅方向。又或者你可以講吓自己曾經同公司同事接觸，好欣賞佢哋嘅能力同做事方式，覺得自己都適合公司。
3. 點解你對呢個職位有興趣？
面試官想知嘅嘢好簡單，就係你有冇正確理由去申請呢個職位 。所以答呢個問題最重要係表現出正確嘅動機。你需要表現出你對呢份工／呢個行業嘅熱情，解釋你有幾適合呢份工，仲有話俾人聽你想點樣發展自己嘅技能，同埋你可以點樣貢獻公司。只要答中呢幾點，一定正中面試官心水！
想面試前更做足功課？可以睇返上年我哋嘅分析文章：
香港面試技巧2018 : 13條常見面試問題 >>
4. 分享一下你喺職場上處理過嘅挑戰／衝突。
面試官想知道你點樣處理衝突，從而衡量你面對壓力時夠唔夠冷靜同克制，畢竟冇公司會想請個遇到壓力就會崩潰同發嬲嘅人。
呢個係你留下深刻印象嘅好機會。除左講解自己嘅經驗之外，大家可以試吓請面試官提出一個情景俾你解決。例如，佢可能會同你講，有個客因為等咗食物好耐都未到而好嬲，你會點處理。你可以同面試官講，你會用一個叫STAR嘅方法處理，STAR係代表：
- 情景 (Situation)
- 職責 (Task)
- 行動 (Action)
- 成果 (Resolution)
以下係一個實際應用例子：
情景： 客人因為等咗食物好耐都未到而十分不滿
職責: 作為侍應，你嘅職責就係平息客人怒火，而且要盡快將食物送上。
行動: 你會平心靜氣，有禮貌咁向客人道歉，並且解釋因為廚師對食物質素好有要求，所以烹調時間會稍長。然後，你會送上一杯免費飲品去補償客人，等佢等候食物期間都可以先享受飲品。
成果: 客人冷靜落嚟，理解你嘅解釋，亦會滿意你嘅補償，耐心咁等食物送到。
呢個就係一個全面詳盡嘅答案喇，面試官一定滿意！你亦可以表現出自己轉數快，有能力處理緊張嘅情況。
5. 你最大嘅缺點係咩？
優點好多人都識答，但有時俾人問自己缺點係咩，都唔知講唔講真話好！其實面試官都只係想知道你對自身缺點有冇自知之明。呢條問題嘅重點係，你要表現出你有努力改善缺點。你嘅答案要話到俾人知，你有決心進步同埋面對挑戰。
回答呢條問題嘅時候，有樣嘢要特別注意：千其唔好答一個間公司無法接受嘅缺點。試諗吓你in緊一份會計工作，份工需要一個對數字敏感嘅人，你居然答佢你係數學白痴，你覺得面試官會點諗呢？唔洗審都知人哋冇可能會請你。你應該：
- 選擇一個職位容許嘅缺點
- 解釋你有點樣努力改善
- 話俾人聽你會點樣克服你嘅缺點
記住要舉出實際例子去證明你點樣克服自己嘅缺點。
例如你嘅缺點係無辦法一心二用，你可以分享你會隨時帶住本記事簿，寫低自己要處理嘅事，從而幫助自己追蹤工作進度，亦都可以講吓你會每日update記事簿提醒自己。
6. 你有冇問題想問？
好多人都會有個錯覺，覺得見工純粹係去答面試官問題，其實見工都同時俾咗機會你去提問。面試官咁問，其實係想了解你對公司係咪真係有興趣。
係咪有啲一頭霧水呢？唔洗驚。記住唔好問啲好容易就搵到答案嘅問題。例如，唔好哂時間問公司上年收入有幾多，因為呢啲資料一上網就會搵到。見工面試係為左了解份工適唔適合自己。真心問吓自己，你到底想知道間公司啲咩？咁樣雙方先會了解對方多啲。不過都要留意，你嘅問題都要視乎面試官係邊個，同埋你in緊嘅職位。
你可以提出關於你個職位嘅問題：
- 點解會有呢個職位空缺？呢個係咪新職位？如果唔係，點解上一手會離職？
- 你哋打算請幾多個人擔任呢個職位？
又或者，可以提問關於間公司嘅嘢：
- 我留意到公司某單project嘅做法係咁，可唔可能解釋吓背後嘅策略？
- 公司會點樣面對某啲市場挑戰？
記住呢個問題係面試官最後一條問題，一定要好好表現自己，俾啲自信，你得嘅！
見工最緊要係：
－儀容得體
－提早15分鐘到達
－對公司所有職員有禮貌（包括茶水阿姐！）
－表現自信大方
千其唔好：
－響電話（震機都唔好）
－打斷別人說話
－聽唔清楚問題就亂答
希望大家見工都會順順利利啦！