香港嘅秋天有幾短，相信大家都知道架喇。所以想趁著仲有涼涼秋意，大家就一於多啲行山啦！其他行山唔一定要好辛苦，如果想一家大細或者同男女朋友有個放鬆活動，可以揀啲容易行嘅路線，唔會太高難度，但依然有美景欣賞！
1. 鷹巢山自然教育徑
除左街知巷聞嘅獅子山，其實九龍區嘅獅子山郊野公園入面仲有條鷹巢山自然教育徑。教育徑全長三公里左右，步行需時兩個鐘。裡面有成十三個觀賞點，主要介紹周圍嘅植物、環境生物現象，仲有鄰近景色，特別適合一家大細行，等小朋友接觸大自然。想去嘅話，只需要坐72巴士或81巴士喺石梨貝水塘巴士站落車。
2. 大潭水塘
大潭水塘其中一段路線就係大潭水務文物徑，由陽明山莊起步，以大潭郊野公園大潭道出口為終點。呢條路線風光明媚，集山水湖光山色於一身，景觀非常開揚。而且，步行其間仲會見到唔少歷史遺跡，包括香港開埠時期嘅石碑、英式石橋、水壩工程同埋二戰時期嘅兵房。呢條路線全長三公里，兩個鐘到就行得完！大家可於銅鑼灣摩頓台巴士總站坐76號巴士到水塘道站落車，然後開始行山路線。
3. 龍脊
「龍脊」堪稱IG打卡勝地，因為呢條路線新手都掌控到，而且景色優美，好多遊客都會慕名而來。行山客到左龍脊山嶺，就可以飽覽成個石澳、大浪灣同清水灣半島景致，大海盡收眼底。繼續行到山脊之頂，仲會喺景觀台會睇到紅山半島同赤柱一帶。呢條路線全長8.5公里，大約要行4個鐘，去嘅話可以喺筲箕灣巴士總站搭9號巴士到土地灣落車。
4. 滘松仔園四色林徑
大埔滘松仔園亦係另一個適合家庭嘅行山好去處，可以一邊行山一邊認識林地生態。沿著山坡行會見到樹木茂密，植物多樣性十分豐富。而且呢度仲有好多鳥種，細心留意會見到佢地覓食。短短2.1公里，1小時路程就可以盡享鳥語花香，走訪城市中嘅一片淨土林蔭。大家可以坐72A巴士到松仔園站落車，行2分鐘就到大埔滘自然教育徑入口喇。
5. 河背水塘
.jpg)
元朗河背水塘曾經獲選為香港郊野十景之一，行山徑環繞河背水塘而建，全程平坦，新手都可輕鬆應付。喺元朗泰衡街坐71號小巴到總站落車，由河背村出發走，兩公里路一個鐘就行得完。沿途兩旁樹木繁茂，到左水壩仲可一覽水塘景色。 行完山仲可以去番元朗市中心行街食糖水，一日內享受郊遊同埋消遣嘅樂趣。
如果大家有其他行山路線想挑戰，記住加入Carousell「行山露營」群組，可以曬下行山美景嘅相，互相介紹行山裝備又得，吹水買賣一條龍！