皇牌家電產品大檢閱

新年新氣象，想為屋企添置啲新家電？今次小編就同大家一齊睇下邊個牌子嘅皇牌產品最值得入手啦！

Dyson

Dyson近年成為港人熱烈追捧嘅家電品牌，全因佢哋嘅功能特別、設計時尚，放喺屋企睇起上嚟別有格調。呢款「三合一風扇暖風空氣清新機 HP00」就係Dyson嘅最新出品，標榜可以自動淨化空氣，過濾花粉、細菌同寵物皮屑，而且有齊冷熱風，功能齊全，好適合香港細小嘅生活空間。而家適逢冬天，當然係最常用到暖風啦。佢嘅熱力分散平均，可以維持成個客廳都好暖和，加上仲有自動感應溫度，維持到最舒適嘅室溫，唔會好似傳統嘅暖爐得個重字，得一忽太熱其他地方又好凍。不過缺點就係比較嘈，而且有發光嘅部分，如果放喺睡房可能會影響睡眠。

Dyson風筒受全城愛戴，變到好似風筒界LV咁個個都買完要開箱哂命，十分誇張。其實小編當初覺得三千幾買個風筒非常浪費，不過直至有一次住酒店時試用到呢個傳說中嘅風筒，確實又覺得幾好用。小編係長髮人士，而且頭髮好厚，平時吹頭髮大概要15分鐘，真係會拎風筒拎到手軟。首先Dyson風筒十分輕巧，設計特色令頭髮唔會攝入罩，最大好處就係風力猛得嚟唔會過熱，5分鐘左右頭髮已經吹乾，唔會成身出汗，而且真係好靜好靜。吹出嚟嘅頭髮都幾有volume，不過就唔覺得頭髮特別柔順光澤。如果唔嫌貴嘅話，呢個風筒的確係長髮人士嘅福音。平時市價要$3380，去Carousell $2000就可以帶新品番屋企喇，平咁多緊係上網買啦！

Osim

Osim 天王椅貴為皇牌產品，呢款按摩椅舒適程度的確不俗，好多人都會買佢嚟做母親節同父親節禮物孝敬親人。不過好多用家都表示雖然天王椅功能出色，但皮革質素就比較麻麻，坐咗一兩年左右皮革就會龜裂同脫落，而且維修保養費不菲，要幾千至近萬蚊。加上香港居住環境狹窄，如果唔係經常使用，似乎就唔多化算喇！

Panasonic

如果覺得Dyson風筒太貴太fancy，呢個Panasonic「礦物納米離子護髮」風筒都係近排日本大熱嘅選擇。佢嘅賣點係護髮風筒，有6種功能，包括熱風、智能控溫、冷熱交替、獨立冷風、頭皮護理同護膚模式。最特別嘅護膚功能係可以吹出用於護膚嘅微弱冷風，保持肌膚濕潤。另外冷熱交替亦可以調節頭髮表面溫度，避免過熱，保護髮絲自然弧度、柔順及光澤。先唔講呢啲gimmick嘅功能，小編覺得佢同Dyson最大嘅分別係Panasonic吹完嘅頭髮較有光澤感，有平時去Salon俾髮型師吹出來嘅光澤順滑效果，造型效果方面較出色，Dyson嘅風力好猛，不過唔夠集中，有時會吹到頭髮打kick。佢嘅最大優點當然係價錢，千幾蚊嘅價格比Dyson親民得多！上Carousell 買再平啲，$1300左右就有交易喇！

浴室寶係小編新屋裝修先發現嘅寶物，立即榮升居家必備產品！呢款Panasonic浴室寶集合暖氣、乾衣同循環功能。平時冬天廁所特別凍，換衫嘅時候凍到震之餘仲好易冷病！有咗浴室寶之後浴室長期保持暖和，沖涼前後都唔怕冷到打黑痴。加上，香港嘅春天特別潮濕，衫褲好難乾，有咗浴室寶之後乾衣問題都改善咗好多，真係好值得投資落家居！

BOSCH

呢款BOSCH無線吸塵機因為消委會報告而聲名大噪，比同類產品嘅始祖Dyson更受熱捧！無線直立式吸塵機最大優點係方便收納，使用方便，適合小型家居。根據消委會報告，售價$3,398元嘅Bosch「BCH6PETGB」同埋「BCH625KTGB Athlet」總評分同Dyson同類產品相同，當中吸淨能力同分，但價錢就只係一半，而且電池續航力評分都唔錯。如果屋企唔算大，不妨考慮呢部功能同價錢都比較吸引嘅BOSCH無線吸塵機！

BRUNO

來自日本嘅BRUNO電熱鍋外型顏色吸引，其中粉紅色同薰衣草色最受歡迎，外型上個人認為拍得住大熱嘅法國名牌鍋具。而且呢款電烤爐仲功能多多，大小適中，三至四人家庭絕對夠用。呢個烤爐除咗可以整章魚燒、牛排、pancake，個深鍋仲可以炆煮、打邊爐、滾湯，連整麵包都得！如果屋企成日招呼朋友，有咗佢就可以整到好多菜材大宴親朋！而家上Carousell 有多色選擇，$850就可以帶個全新鍋番屋企開party用！