無論係男女老幼，屋企鞋櫃都一定會有對白波鞋看門口。老實講，呢個世界係冇白波鞋襯唔到嘅打扮， 今次就同大家跟名模同明星偷師，學下點樣將唔同款式嘅白波鞋融入日常打扮啦！男仔女仔都可以參考下！
男女適用：
- T恤＋牛仔
上身T恤、下身牛仔、腳踏白波鞋，呢個配搭可謂係經典中嘅經典。唔好睇少對白波鞋呀，一對靚波鞋絕對可以幫你修飾腳型，視覺上會令人睇落修長啲。呢個造型十分隨性，可有型可甜美，絕對冇得輸！
白波鞋嚟講，Adidas Stan Smith出名易襯，絕對值得入手！
2. 全白造型
全白打扮俾人一種和諧而且乾淨舒服嘅感覺，但係又唔會睇上去好悶，反而仲好醒神突出𠻹！大家可以仲可以用誇張或者搶眼顏色嘅飾物增加睇頭，亦可以換條彩色鞋帶落對白波鞋，點綴一下。
女裝貼士：
- 運動leggings
唔係做運動都要著運動裝──呢個大概係時下其中一個最hit潮流！點解咁多女仔中意咁著呢？皆因好多女裝運動leggings都會令雙腿睇落纖瘦啲,襯件crop top亦可以show下小蠻腰得嚟又有陽光健康嘅感覺！呢個打扮著白波鞋自然就係天作之合啦！
2. 碎花連身裙
碎花連身裙俾人一種少女、甜美嘅感覺，再襯平底鞋就未免太過斯文同拘謹喇！著白波鞋既活潑又舒服，而且波鞋比平底鞋更有厚度，自然會將人比例拉長啦。
3. 西裝外套
好多女仔中意著西裝外套出街，型格悍練。但係話哂都係出街，冇理由著皮鞋咁正經掛？呢個時候就係白波鞋出動嘅時候喇！波鞋能夠即時為造型增添休閒感，想再型啲可以看圖中模特兒，襯番對目前大熱嘅厚重”dad shoes”𠻹呀！
Dad shoes話哂都係時下大熱，想擁有一對，加入潮人行列，去Carousell揀番對啦！
男裝貼士：
- Polo tee+ 短褲
Polo tee加短褲可謂係經典英倫紳士造型，好多時都會配帆船鞋。其實，配白波鞋都係個唔錯嘅選擇，可以增添休閒舒適嘅感覺，令人睇落更加平易近人。
2. 西裝
簡單利落嘅西裝一向係男士最愛，不過大家不妨參考下碧咸，佢連出席發佈會呢啲正經場合都會西裝襯白波鞋，大方得體之餘睇落又唔會好似太過悉心打扮，多一份隨意。
3. 衛衣＋運動褲
潮流教主Kayne West備受全球追捧，著親咩都會惹來萬人仿效，其中衛衣、運動褲、白波鞋就係佢最愛造型之一，Kayne身上嘅yeezy仲係出自佢本人嘅時裝系列𠻹，聽講炒價極高，一對難求架！
一雙雪白迷人嘅波鞋，就算係遠處都總會吸引到眾人目光。只可惜只要有些少污糟，白波鞋嘅魅力就會會大大減低，想好好保護心肝寶貝，建議大家每次著完出街都用布輕輕一抺，將灰塵同小污積盡早抺走。萬一真係出事，成對鞋污糟咗，可以先浸漂白水，再浸水加白醋，然後喺陰涼地方風乾。最方便嘅做法，當然係買番支防污防水噴霧，出街前輕輕一噴，咁就可以隨心所欲，點著都冇有怕啦。
