夏天又到喇！無論你係學生哥定打工仔，有冇暑假放都好，吊頸都要抖下氣嘅！7,8月嘅活動咁豐富，唔係唔出街玩放鬆下掛？今次同大家分享本地夏天必做十件事，創造個美好嘅夏日回憶啦。
1. 中環夏誌
「中環夏誌」將會由7月6日至8月26日喺中環海濱舉行，到時會有加大碼遊樂園、illuminate! 戶外燈光藝術展品、遊樂場設施同遊戲，最重要係免費參加，大家可以盡情享受休憩時間！
2. 世界盃決賽
上次介紹這過香港邊度有波睇，大家今次就記得mark實日子，7月15日（星期日）晚上11點，直擊呢項四年一度世界盛事嘅決賽！難得今年個時間咁靚，唔洗捱夜睇波，世界盃決賽簡直係與眾同樂嘅絕佳活動！
3. 書展
每年書展都係暑假重點活動之一，2018年活動會喺7月18至24日喺會展覽舉行，主題仲係「愛情文學」！無論你係唔係愛書之人，書展都係值得一去嘅展覽，話唔定今次一去，就會重捨閱讀嘅熱情？
4. 蘭桂坊音樂啤酒節 2018
蘭桂坊音樂啤酒節一向都係年度盛事，嗰度除左有本地同進口精釀手工啤酒同各地美食外，仲有無間斷現場音樂表演，氣氛一定十分狂熱，適合一大班朋友飲個痛快！活動將會喺 7月21同22日（星期六日）一連兩天舉行，週末去盡情狂歡啦！
5. 香港電競音樂節
電競音樂節會係個結合電子競技賽同音樂會嘅活動，將會喺8月24至26號喺會展舉行，呢個活動每年都會邀請一班來自世界各地嘅頂尖電競選手對決，打機發燒友除左可以觀賽，仲可以去體驗專區試玩新game，而且仲可以直落去紅館參加音樂會，簡直就係一次過滿足你三個願望！
6. 海洋公園動夏嘉年華 2018
海洋公園夏日嘉年華一向都係一家大細好去處，除左有平時玩開嘅機動遊戲同動物館，仲有大型加勒比巡遊、奇藝雜技，同韻律泳表演！又玩又睇，夠哂豐富，快啲買返張飛去玩！
7. 迪士尼樂園Pixar水花大街派對
熱愛迪士尼卡通人物嘅粉絲今個夏天汁到喇，事關今年夏天樂園會有全新大街表演，到時會近距離見到超人特工隊同玩轉腦朋友 ，沿住美國小鎮大街帶黎水花四濺嘅動感表演。夏日炎炎，見到水花表演心都涼哂啦，快啲買返張飛去玩！
8. 香港貿發局美食博覽
見到「美食」兩個字，相信我唔洗解釋大家都流哂口水啦？今次美食博覽喺8月16至20日會展舉行，到時過百個美食攤位，唔買都試食試到飽啦！
9. 國際綜藝合家歡
國際綜藝合家歡 會由7月6日至8月12日舉行，唔好以為個名叫合家歡，就係得細路仔岩去呀。其實綜藝合家歡 有好多藝術表演睇，有蘇格蘭芭蕾舞團改編的經典格林童話《糖果屋歷險記》、《老鼠上月球》為主題嘅電光霹靂舞，仲有香港中樂團推出的《幾米繪本》同名音樂會，包羅萬有，氣氛一定愉快輕鬆！
10. 香港芭蕾舞團 : 愛麗絲夢遊仙境
愛麗絲夢遊仙境係家傳戶曉嘅童話故事，仲曾經翻拍成電影，唔知大家又有冇睇過芭蕾舞演繹呢？香港芭蕾舞團將會喺8月17號至19號上演呢齣充滿驚險和奇遇嘅故事，一定會好有驚喜！
見到以上介紹，係咪覺得今個夏天活動好豐富好吸引呢，仲唔約實親朋戚友喺香港玩到盡？