【精明消費】六大網購二手名牌注意事項

0
3367

相信大家都留意到近排某啲牌子例如LV、Chanel同Hermes都不斷加價,想買熱賣款仲可能要等三個月至半年,真係一袋難求!因應疫情,有好多人都會選擇網購,而有某啲品牌更加出現供不應求嘅情況。近年多咗人選擇喺二手買賣平台選購全新或二手名牌手袋,當中仲有唔少更加係熱賣款。搵到心頭好當然值得高興,但買賣手袋嘅時候記得要做個精明嘅消費者。以下有幾點係交易時必需注意嘅事項,保障自己避免墮入騙局,免招損失。

 

  1. 做功課

係選購你嘅心頭好之前,一定要對佢嘅價錢、款式等資訊有一定嘅了解。買家可以先上網搜尋手袋嘅專門店價錢、或者參考係一啲國際知名嘅精品網店,例如係Selfridges, Net-a-porter, Harrods, 除左價錢之外仲可以知道手袋嘅細節,包括皮質、尺寸、配件等資訊。呢啲資料可以方便買家比較二手平台上嘅手袋,係一個保障自己嘅好方法!

harrods, luxury, designer brands
圖片來源:Harrods官網

 

2. 留意賣家個人檔案

見到心頭好嘅時候,記住要首先睇下賣家嘅資料啊。有部分二手買賣平台除左可以睇貨品,仲可以睇埋賣家嘅個人檔案,包括佢過往嘅買賣記錄同評分。

而係Carousell上面,買家可以撳入去賣家個人檔案,留意佢嘅交易評價及評語,判斷佢係咪一個值得信賴嘅賣家。累積評價愈多,而評分愈高,就代表呢個賣家愈信得過!個人檔案始終都只係其中一個參考指標,係交易之前記得要睇多啲過往買家嘅評論,再自行判斷啦!


 

3. 交易時同賣家多溝通

進行交易嘅時候,最緊要係同賣家有良好嘅溝通。買家可以問多啲關於商品嘅問題,例如係商品嘅來源、有無全套完整包裝、付款方法以及交收流程等,確保賣家可以提供相關資訊俾買家作參考。

除此之外,買家亦都可以要求賣家提供商品嘅相片及影片,咁就可以睇多啲商品嘅細節,例如係單據、使用程度、Logo等。買名牌產品始終涉及一個唔細嘅金額,如果對商品有所懷疑,仲可以試下要求提供陪驗服務,為自己提供一個保障!

 

4. 選擇有信譽嘅商戶

係二手買賣平台除左有一般用戶放自己嘅二手手袋,更加會有一啲商戶提供代購服務、售賣全新嘅手袋或者係專賣中古手袋。所以係選擇商戶嘅時候要先睇清楚佢哋售賣緊邊類產品。

而係Carousell上面,有部分用戶心係有認證嘅「旋轉商戶」,旋轉商戶係指一啲經Carousell認證嘅真實商戶,一般會有較高嘅可信性。要辨別邊啲係旋轉商戶,可以透過睇下賣家嘅介面,如果有鑽石徽章,就代表佢係旋轉商戶喇。

 

5. 避免一次性支付大額訂金

如果要喺買賣平台進行大金額嘅交易,要提高警覺,盡量避免一次性支付大金額訂金。可以考慮以支付訂金嘅型式進行。如情況許可,可以盡量要求與買家面對面交收,交收時更可詳細檢查商品,確認無問題後才一手交錢一手交貨,咁就穩陣得多啦!

但係近排疫情嚴峻,除左面交之外都可能要考慮下多用影片去檢查貨品,或者係賣家先將手袋送去驗真,再由買家去取貨,都係一個好嘅方法。

 

6. 盡量保留對話紀錄

如果不幸遇到懷疑騙案/懷疑買到假貨,請盡量將對話保留於Carousell以確保必要時刻有完整嘅紀錄,協助平台進行調查。若需將對話移至其他通訊平台,例如Facebook、Whatsapp、Telegram等,就要格外小心喇!係對話嘅時候記得儘量避免提供個人敏感資料,特別係一啲信用卡資料。保護好自己咁買嘢就安心又放心啦!

LEAVE A REPLY

Please enter your comment!
Please enter your name here