快速指南建立專屬「子彈筆記」

唔知大家有冇成日凝住自己唔記得咗嘢，或者冇咗facebook提醒就唔記得朋友生日？現代人每日都有幾百件事喺腦海氹氹轉，想記嘢清清楚楚嘅話不妨試下「子彈筆記法」（Bullet Journaling）! 好多科學研究都指出，寫字記錄遠比用電子產品打字記低更有效幫助理解。

喺介紹點樣建立大家嘅專屬「子彈筆記」之前，以下係兩個小貼士教各位點樣管理「子彈筆記」：

1. 簡單就是美：實用易睇最重要，唔洗為咗post相晝到鬼火咁靚架。
2. 寫筆記係為咗記錄，唔好夾硬要本筆記完美無暇。

終於可以開始喇！材料好簡單：一支筆、一張紙！

筆

小編本人就比較中意用原子筆寫子彈筆記嘅，因為冇咁容易花，而且睇上去企理啲。如果你中意用啲靚靚原子筆，又或者印有鼓勵金句嘅鉛筆，可以考慮以下嘅選擇架：

• 鋼筆
• 金句筆
• 黑色啫喱筆
• 按掣螢光筆

紙

外國嘅BuJo狂粉（即係中意瘋狂寫Bullet Journal嘅朋友。冇錯，我見過，我真係見過！不如我哋可以考慮喺旋轉拍賣開番個BuJo 群組？），佢哋好多都係Leuchtturm1917筆記簿嘅忠實擁躉，不過我就選擇用屋企書枱本訂製筆記簿喇！

選擇筆記簿前，應該考慮以下兩點：

1. 筆記簿大小：太大本唔方便攜帶，太細呢又唔夠位寫，記得要揀好size。
2. 內頁設計：筆記簿內頁有分普通線、正方格、點點同埋空白款式，我自己就中意用點點內頁喇，因為有間隔之餘又寫咩都得，唔會遮住。

子彈筆記內頁參考

子彈筆記嘅骨幹主要就係目錄、年記、月記同埋日記。當然啦，隨自己喜歡同需要，大家可以自由編寫，就好似年記咁，如果你覺得冇需要嘅話，可以刪減架。大家亦都要了解自己對時間嘅敏感度，設計出最適合自己嘅子彈筆記。

目錄

重要事要講三次，目錄頁好有用、好有用、好有用！目錄頁可能幫大家將雜亂無章嘅內容整理好，一切一目了然。

對我嚟講，子彈筆記嘅好處之一就係有無限空間去自發寫嘢。我哋唔需要強逼自己連續寫特定嘅嘢，只要新嘅諗法，就可以隨時揭去下一個新頁開始寫！咁樣大家就唔洗成日估估下要留頁寫嘢，然後又因為預錯數而哂咗頁數喇！

每日慢慢累積，目錄頁好快就會填滿每頁嘅資料，指引你點樣搵番想睇嘅內頁。

年記

所謂年記，其實就只係年曆姐！設計年記可以有好多花神，而我就參考@blackinkjournal設計出一個迷你年曆喇。

月記

其實當我開始想整子彈筆記嘅時候，都有啲遲疑架，因為嗰陣已經係二月中喇！不過好彩我唔係完美主義者，決定照樣開始寫！俾個貼士大家，心動不如行動，無論係五月定十月，想寫就開始啦！

設計月記好簡單，只要一欄欄寫低月份嘅日數就得架喇。同一個星期嘅日子寫埋一齊，會更方便睇。

日記

如果同漢堡包去比喻子彈筆記，咁日記就一定係舊多汁厚肉喇！想令日記更實用，可以參考下呢幾個小貼士：

1. 符號

子彈筆記嘅精萃就係愈簡愈好，大家可以參考下呢啲符號幫助整理雜項：

2. 記低有意義嘅事

除咗寫低要完成嘅鎖事同活動，其實大家都可以試下記低啲有意義嘅經歷。小編自己就中意記低朝早起身喺腦海閃過嘅idea，又或者每日達成嘅小成就。

漢堡肉幾好食都要醬汁加持嘅！子彈筆記嘅點綴就係「珍藏」呢部份喇。我身邊有朋友中意用子彈筆記記錄習慣、網上購物訂單、每日心情之類。以下就係我中意記錄嘅嘢：

珍藏

「珍藏」呢一頁係好隨心嘅，唔洗一早plan好要寫咩架！我之前成日左揭右揭本筆記想要搵番某啲書名，所以就萌生咗個念頭，開番個「心水好書」嘅珍藏頁。

子彈筆記就係咁易整咋！完結前俾多個小貼士大家：寫錯嘢嘅時候，唔好完美主義者上身又塗又改，直接刪咗佢寫過啦！記住子彈筆記嘅目的係記錄，唔係用嚟鑑賞！希望大家都會好快設計出最適合自己、最實用嘅子彈筆記，佢絕對可以改變你嘅生活！只要將日常事情好好記錄，下次想買禮物俾人就唔怕冇靈感啦！