第二階段消費券將於8月7日派發，除咗原有嘅 Ali payHK、八達通、Tap &Go「拍住賞」同 WeChat Pay HK，今次仲新增咗 BoC Pay 同 PayMe，消費者又可以因應自己嘅需要，選擇最理想嘅支付方式。今次我哋精選十大消費券分類，包括玩具、傢俬同化妝品等等，趁未出消費券之前，準備定你嘅Shopping Bucket List啦！
1) 中古名牌手袋
近年除咗一眾名牌手袋不斷加價之外，其實仲有中古名牌手袋嘅崛起。中古名牌手袋嘅定義係已經出產超過20年嘅名牌手袋，價錢相對於新款真係抵玩好多㗎！但係都要留意，手袋嘅質素、使用痕跡、甚至係有冇完整包裝等等，都好影響中古手袋嘅價值㗎。
Pre-owned Louis Vuitton Nice Nano Monogram
中古手袋好多時都有分等級（Ranking），AB級或以上嘅都可以算係上品。因為中古名牌手袋嘅抵玩價錢，吸引咗一眾預算有限嘅女生們，或者希望入手名牌嘅女士，亦都有一類人士係特別對中古手袋情有獨鍾，比嗰種Vintage嘅感覺吸引住！如果你都係其中一員，不妨考慮用你嘅消費券買返一個高質素款式又啱心水嘅中古名牌手袋啦！
Chanel Vintage Makeup Case (Black) H182
2) 桌遊、特別版模型
玩桌遊已經成為左一大班朋友聚會嘅時候必玩嘅嘢，特別係疫情之後，桌遊就喺一個家庭裏面變得非常重要喇。無論係用嚟招呼朋友，定係想凝聚家庭，市面上有咁多款唔同嘅boardgame，總有一款啱你玩嘅！如果你已經入手咗好多唔同款式嘅boardgame，不妨考慮吓喺Carousell上面放咗佢，或者同其他boardgame愛好者交換，咁就可以令大家都玩到唔同款式嘅boardgame啦！
當然對一班大細路嚟講，Figure就更加吸引啦！相信唔使我多講啦，模型可能已經入咗佢哋消費券嘅 Bucket list 㗎啦！無論係已經絕咗版嘅模型，定係一啲熱門嘅款式，係Carousell都有機會搵到㗎！
3 ) 經典復古相機
話咁快菲林相機呢一個熱潮已經係香港幾年喇！由最簡單最易上手嘅傻瓜機，去到需要技巧去使用嘅單反菲林相機，至今仍然好受一眾文青嘅歡迎！好多文青去到邊都會拎住佢部菲林相機周圍影，為嘅就係嗰嗰種一日未曬相一日都唔知自己影咗啲咩嘅感覺，影出嚟嘅相就更加珍貴！如果你都想入坑，不妨可以喺Carousell上面睇吓有冇啱你用嘅菲林相機！
如果想平平哋試吓菲林相機嘅感覺，傻瓜機或者半價相機都可能係一個好嘅選擇。如果你對光圈快門有認識嘅話，我就推薦你試吓入手一部入門級嘅單反菲林相機喇！有部份嘅單反菲林相機都只係需要你調校光圈同快門，內置測光功能，咁就唔怕要交幾卷菲林嘅學費啦！
4) 過百架豪華房車出租
考咗車牌但係屋企又冇車嘅你，唔想個牌變做雪藏牌？趁假日有時間不如租架車，車你嘅好朋友或者屋企人喺香港嚟個Roadtrip啦！其實香港都有好多值得你揸車去嘅地方，最熱門嘅例如西貢、流水響水塘、泥涌、大埔小白露及浩和街等等，我無論係想去一轉生態遊，定係純粹想享受下城市嘅綠洲，或者車女朋友去打卡， Carousell嘅租車服務都可以幫到你！
如果你係租車新手嘅話，記得留意番以下嘅注意事項：第一，要揀信譽良好嘅租車公司。係出車之前要檢查清楚車輛外觀有冇損壞，以免喺出車之後有任何誤會。第二，留意租車公司有冇提供保險俾租車啲客人，有部份私人租車公司未必有保險保障客人，只會保車主，所以真係要細心留意啊！最後就係要選擇合適嘅車款，因應你想去嘅路線揀返啱用嘅車款，例如係如果你要上山嘅話可以選擇返SUV或者越野車，當然都要揀返適合你車牌嘅車輛啦！
5) 家居服務有得揀
呢個世界有兩種人，一種係屋企一定要十分之整齊、冇任何雜物嘅人。第二種係屋企亂中有序嘅人。無論你係邊一種人，都會想屋企住得舒服。咁家居服務就啱晒你喇！無論係想簡單清潔家居、啱啱裝修完進行一次除甲醛嘅大清潔、定想搵一個長期鐘點，我哋專業嘅清潔服務商都可以提供服務㗎！
等等先，你可能會諗家居服務同消費券有咩關係？其實除咗買一啲產品之外，你嘅消費券都可以用來購買家居服務㗎 ！除咗啱啱所講嘅清潔服務之外，仲有其他唔同嘅家居服務，例如係家居維修、冷氣服務及搬運服務等。順帶一提，除咗家居服務之外， Carousell都有各式各樣嘅休閒服務，包括美容服務、健身及運動課程及補習服務等！
COVID-19 空間消毒 Disinfection Service
6) Furniture 新淨傢俬擺設
屋企啲傢俬用咗好多年？有冇諗過幫你屋企嚟個大翻新？有時唔一定需要大裝修，只要換過一啲新嘅傢俬，都可以帶到一種新嘅感覺俾屋企。如果你想屋企行小清新無印風嘅話，建議可以購入多啲木質嘅家具，例如係日本扁柏(檜木)。呢一種木材係日本喺世界中引以為傲嘅木材，檜木被認為砍下之後嘅200年間會越來越強韌，唔容易腐壞，係一種非常耐用嘅木材嚟㗎！
傢俬係絕對值得投資嘅家居用品，選擇一款耐用又美觀嘅傢俬除咗可以令家具增添一點儀式感，佢嘅耐用性仲可以令未來嗰10年都唔使為傢俬煩惱。雖然買傢俬嘅消費比較大，但嚟緊有消費券可以補貼一下，咁就冇咁肉赤啦！
@BiGiwood
7) 名牌香水、美容小電器
要講女士每個月最大嘅洗費，護膚品同化妝品必定係佢哋嘅其中一樣重點消費項目。如果想入手一啲性價比高嘅產品，貪靚嘅女士們可以考慮吓美容小電器，例如係洗面機或者脫毛機等等！
我相信好多女士都有儲香水嘅習慣，除咗因為各有特色之外，當然就係因為香水樽設計啦！如果平時覺得買一支香水好肉赤嘅話，出咗消費券就係一個好好嘅你又比自己買香水啦！
Chanel No.5 EDP 100ML (For Women)
8) Mobile Phones & Gadgets
每次一聽到有消費券推出，大部份人第一時間就會諗起「換電話」！電子產品可以話係香港人最常用消費券去購買嘅一個分類，的確大家每日用得最多嘅好可能就係你手上嘅嗰部智能電話！其實除咗電話之外，智能手錶、平板電腦、甚至係電話case，都好適合用消費券埋單㗎 ！
9) TV & Home Appliances
覺得屋企部電視太細？如果你對屋企電視或者音響有要求嘅話，今期嘅消費券就可以作為一個大大嘅補貼，等你可以upgrade你嘅音響，為屋企打造一個家庭電影院，享受天倫之樂！如果你只係比較入門級，但又想提高屋企電視嘅音質，你就可以揀返一個適合嘅Soundbar，無論係睇電影定睇電視，都更有真實感更加有feel！
10) Women’s Fashion
唔知作為女士嘅你有冇一種感覺，就係無論屋企衣櫃有幾多衫，總好似可以再買多啲，再襯多啲唔同嘅style出嚟，買衫就好似一個無底深潭咁啊！如果有時買多咗，發覺嗰件衫未必啱你style，除咗將佢埋藏喺衣櫃嘅深處之外，其實放返上Carousell賣，都係一個選擇嚟㗎！當係為咗環保又好，幫自己增加下一季買衫嘅budget都好，賣衫都係一個好選擇！賣衫多咗嘅錢，再加埋消費券幫補，又可以買多一季新衫啦！
日本品牌Sheer front knot blouse 薄透前結襯衫
Carousell早前已推出電子消費券標籤，讓用家輕易分辨出邊啲商品可以用消費券付款。隨著第二階段電子消費券即將派發，我哋亦加強咗消費券篩選功能，用家只要喺搜尋後運用篩選器，碌到最底再剔選「接受電子消費券」，然後撳套用，就可以直接篩選出接受消費券嘅商品，真係超方便啊！
