【廚房裝修設計】磁磚款式點樣選?8款熱門廚房磁磚推介

0
1444

熱愛煮食嘅人對廚房有非一般嘅執着。廚房裝修設計要貼合屋主嘅個性同家居風格,而磁磚正好係令廚房更有特色嘅裝飾。以下分享「好師傅」參考案例中嘅 8 款特色廚房磚:

 

1. 麵包磚

麵包磚有兩大種類:立體感強嘅「斜邊磚」同質感細膩嘅「平邊磚」。前者能帶出較強烈嘅工業風,後者則更適合簡約家居。

麵包磚配搭唔同嘅「掃口」(接縫) 顏色,亦可以巧妙地呈現唔同風格。使用對比色可突出每塊麵包磚,感覺更粗獷;而使用相近嘅顏色,則形成整體感覺一致嘅特色牆。

麵包磚嘅鋪貼方法通常用「工字貼法」,帶出簡潔嘅美感。

 

2. 葡萄牙花磚

具有葡萄牙復古色彩嘅花磚向來係經典款式,透過各種花紋點綴空間。

鮮艷且多變嘅特色花磚,配搭淺色廚房更能襯托出復古質感。市面上大多嘅花磚較為平面,喺廚房使用更方便清潔;但其實立體感強嘅花磚喺視覺同觸感都更似葡萄牙磚,不過清潔就相對上需要較多時間。

留意使用花磚,喺其中一面牆身 (例如爐頭位) 鋪貼花磚已經足夠。如果大面積使用,可選擇低調沉實嘅深藍色或黑色花磚,避免眼花繚亂。

 

3. 六角形磚

廚房牆身鋪貼六角形磚嘅玩法非常多,本身設計已能造出幾何效果,調整每塊磁磚角度又可以造出唔同效果,帶出一絲不規則嘅流暢感。

六角形磚更複雜嘅玩法係同方形磚混鋪,混搭磁磚款式,又或者以貼法突出留白空間。

六角形磚款式多變,有雲石紋、花紋、仿水泥磚等各種元素,鋪喺廚房牆身有如一幅畫作,非常吸睛。

 

4. 幾何磚

想喺牆身造成幾何效果,唔一定要用六角形磚,用有幾何花紋嘅正方形或長方形磚一樣可以。

喺廚房鋪砌幾何圖形能帶出現代風格,透過簡單嘅色塊同線條,排列出獨特嘅藝術感。以幾何磚作為設計主軸,加上錯落有致嘅鋪貼法,令牆身更有趣味,成為空間中嘅亮點。

 

5. 仿水泥磚/清水模磚

隨著輕工業風興起,「仿清水混凝土」風大受歡迎,唔少人將呢種水泥原始自然感覺融入廚房裝修入面。

霧面灰色嘅仿水泥磚,無過多嘅裝飾及色彩,只有淡淡紋理,帶着極簡主義嘅概念為空間提升至另一個生活層次。

 

6. 仿雲石磚

仿雲石磚嘅技術越趨成熟,喺紋路同完整度上能更真實地呈現雲石嘅天然質感,最配搭高雅廚房裝修。

除咗白色仿雲石磚外,灰色、黑色等偏深色系嘅仿雲石磚,近年亦有更多選擇,可配搭輕工業風家居。

選用較大塊嘅仿雲石磚可減少「掃口」嘅次數同闊度,紋路睇落去更細緻完整。而廚房選擇拋光磚比起霧面磚顯得更光亮,流露輕奢華感。

 

7. 壓花磚

壓花磚即係帶有立體紋理嘅磁磚,屬較另類嘅選擇。壓花磚花紋通常以自然線條為主軸,當中又以白色壓花磚最為熱門。

樹葉紋、圓形線條等自然簡約圖案,能增添北歐風感覺。由於佢係一體式嘅磚面,面積比麵包磚、花磚大塊,清潔上亦不難。

 

8. 馬賽克磚

形狀、顏色多元嘅馬賽克磚其實唔一定好花巧,好似圖中案例一樣可以做出相對簡潔又有特色嘅效果。馬賽克磚亦有各種材質可選擇,例如陶瓷、貝殼、玻璃、金屬、石材等。由於「掃口」多,喺廚房使用馬賽克磚清潔會較麻煩。

想參考更多好師傅嘅真實設計案例,可以 click 呢度睇更多!

LEAVE A REPLY

Please enter your comment!
Please enter your name here