即係你平時唔中意化妝，但係番工番學想面色均勻啲有神氣啲，都總要上少少粉嘅！粉底最重要就係妝感自然透薄，有少少光澤，搽完好似天生麗質咁！踏入秋冬季節，粉底同衣服一樣都要換季，今次就同大家檢閱下邊隻粉底適合邊種膚質啦！
1.Clé de Peau鑽光粉底霜
Clé de Peau一向都被譽為粉底界嘅強者，呢款鑽光粉底霜質地滋潤，十分易推，所以用量唔洗好多已經足夠搽全面。佢嘅遮瑕度中上，上妝後粉底透薄得嚟又好有光澤，好似本身皮膚就好好一樣，而且持久度亦好唔錯，無論係日常超近對望，定係影相上鏡，佢都唔會令人失望。唯一嘅缺點就係價錢十分之貴，專櫃買成千蚊！好彩Carousell而家$600就可以帶走，想入手就咪走寶喇！
2. Bobbi Brown蟲草修護精華粉底液
呢支粉底液主打蘊含滋養嘅冬蟲夏草，同埋其他高效保濕嘅精華， 避免因為乾燥而出現唔上妝嘅情況。個人認為佢嘅保濕作用真係唔錯，即使係鼻翼、眉心呢啲甩皮位都唔會kick粉，上妝後亦好貼服同透亮，作為秋冬粉底的確唔錯。不過用咗半日左右，氧化變暗嘅情況都頗為明顯，雖然唔係接受唔到，不過都會扣少少分！
3. Laneige玫瑰光雙效氣墊粉霜
講到氣墊粉底，韓國品牌一定係前驅！Laneige嘅呢隻氣墊粉霜主打底妝遮瑕二合一，締造無瑕明亮嘅妝感。朝頭早想拿拿林出門口，拍幾拍就可以完成底妝，真係幾方便嘅，而且出街補妝亦唔洗帶掃。不過小編就覺得呢款氣墊粉底比較乾，易顯眼底額頭乾紋，加上遮瑕度高，所以妝感都會厚重，近睇嘅話唔自然，所以即使真係好方便，我都唔多推介！
4. NARS水潤透亮有色面霜 SPF 30/PA+++
如果你同小編一樣都係懶人一族，朝早成日賴床冇時間扮靚，想快快手搽啲嘢就出街？NARS呢隻有色面霜就適合你喇。話明叫有色面霜，遮瑕度自然就係偏低架啦，佢會遮到基本嘅泛紅同埋暗沉，令膚色睇落均衡同埋亮澤啲，效果都保持到大半日。由於佢係面霜，所以一定唔會有浮粉、唔貼服嘅問題，乾性皮膚好啱用。不過佢質地好潤身，一定要上番碎粉定妝。如果你係追求完美無瑕，陶瓷肌效果呢，呢款就唔係你杯茶喇。
唔知產品適唔適合自己嘅話，可以上網買支旅行裝試用！
5. Make Up Forever雙用水粉霜
產品最打凝膠質地，質感好似保濕啫喱咁，延展性極高，可以用手超快上妝。而且佢標榜有高達80%維他命原B5淨化水，加強保濕之餘亦打造水感透亮底妝。的而且確，呢款粉底係我用過最水最輕最薄最貼嘅粉底，呢個係佢最大嘅優點，亦可以話係佢嘅缺點。因為太薄太水嘅關係，佢嘅遮瑕度只係比有色面霜稍高，適合一啲皮膚冇咩瑕疵，想要零妝感光澤肌嘅朋友！而家Carousell只係賣緊$169，差唔多係正價一半！
希望呢個分享會幫到各位朋友挑選心水秋冬粉底啦！