只要係有質素嘅衫，全新、二手都可以著得好時尚！今次Carousell邀請咗二手衣服店 a break 93 嘅兩位店主，同大家分享揀春夏二手服飾要注意嘅五個小貼士！學識呢五招，一定買到高質靚衫啦！
第一招：檢查淺色衫化妝品／汗跡
夏天經常會著啲淺色衫。天氣咁熱好容易流汗。可以留意前後領口同腋下位置，睇吓有冇汗跡或者化妝品跡。白色衫特別容易污糟，買二手衫嘅時候就要注意喇！
第二招：雪紡衫爆線情況
雪紡質地係夏天衫都好常見。因為雪紡比較薄，有時會勾到啲先線，所以底面都要睇清楚。另外夾位成日會郁到，如果爆左線、穿左窿，個窿好容易愈整愈大架！
第三招：底裙有冇損耗
買裙嘅時候，表面睇落可能好靚，但係交收時記住入面都要睇清楚！如果底裙穿咗窿，其實自己都可以補返嘅。
第四招：檢查有冇起毛粒
買二手衫都要留意起毛粒嘅問題。手袖位經常會有磨損。另外有時咩袋，patpat、近腰位置都會好容易摩擦到，就要留意返會唔會有好多毛粒喇！
第五招：皮革有冇爆裂或壓痕
如果係皮製服飾，或者衫上面有皮革裝飾，收藏呢啲衫要比較小心。如果衣架有夾，有可能會夾到件衫有夾痕，咁就冇咁靚喇。同埋皮太耐冇著都有機會出現裂痕況架！
