聽到荃灣呢個地方，可能大家都會諗起天橋之城。因為荃灣就係由行人天橋連接超過20個住宅屋苑， 25個商場，令街坊都可以無懼日曬雨淋咁，通往荃灣區來各個地點。對於一眾上車戶嚟講，其實荃灣更加係一個上車熱點，有唔少筍盤到暗藏喺荃灣區內！荃灣區內屋苑數量眾多，而且各有特色，亦都各具優點，有意喺荃灣置業嘅人士應該點樣選擇？今次就等我哋為你詳盡咁分析荃灣區內各個熱門嘅屋苑，由屋苑嘅開則，到配套，我哋都一一同你拆解！
今次嘅分析主要分為四個區域：
↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓
鄰近荃灣站
荃灣站為港鐵荃灣綫嘅尾站，方便通往港九各區。亦都係荃灣天橋之城嘅「起點」之一，通往愉景新城、荃灣西站、荃灣廣場等地標。由於鄰近地鐵站，而且附近嘅屋苑樓齡都相對較舊，變相門檻較低，亦都係熱門上車盤！雖然係咁，但勝在交通方便，而且配套齊全，美食及購物熱點都無一缺乏，所以吸引到唔少投資及自住人士嘅垂青！
綠楊新邨 Luk Yeung Sun Chuen
位於荃灣站上蓋嘅綠楊新邨， 往返九龍新界極為便捷，加上鄰近青山公路、公共巴士站、專線小巴站及渡輪碼頭，交通方便快捷。坐落於地鐵站上蓋，自然就係荃灣天橋網絡嘅其中一份子，方便連接區內各個大型購物中心，無論係日常生活，定係消遣娛樂，荃灣市中心區內嘅所有購物商場，喺綠楊新邨出發經過天橋都可以輕鬆到達！
屋苑配套方面，基座設有購物商場綠楊坊，提供各類型生活小店，更有美食小天堂之稱！屋苑平台更設有花園及少量遊樂設施，配套完善，所以絕對係區內熱門上車屋苑之一。綠楊新邨單位隔實用，所有單位都係沿用兩至三房間隔，因為廳房都無窗台，所以實用率更加超過八成。外望山景，環境恬靜，景觀開揚，高層可遠眺港島風光。
地址：荃灣惠荃路22-26號
萬景峯 Vision City
萬景峯為荃灣市中心名氣較大嘅項目，集配套及多元間隔兩大優勢。屋苑間隔方面，主要提供三房或者以上嘅大單位為主，由700尺至1000尺不等，而樓底亦相對較高，大部份單位樓底有成10尺高，加上每戶都有露台，絕對係區內有意換樓家庭嘅首選。中高層單位俯瞰開揚市景，部分座向青衣嘅單位仲有機會望到海景。
萬景峰有行人天橋直達港鐵荃灣站同荃灣西站，步程只需10分鐘。基坐商場有小巴總站直達旺角。配套方面，萬景峯更擁有市中心購物優勢。屋苑大型商場荃新天地，連同鄰近嘅荃灣廣場，提供更齊全嘅購物體驗。另外，屋苑仲好近楊屋道街市，絕對適合家庭居住！
地址： 荃灣楊屋道1號
荃灣廣場 Tsuen Wan Plaza
荃灣廣場係荃灣市中心嘅老牌屋苑，最大嘅賣點係交通及商場購物配套。荃灣廣場鄰近荃灣西站亦都係荃灣市中心天橋網絡覆蓋嘅一個屋苑，方便往來各個區內購物熱點及街市等設施。而荃灣廣場嘅基座商場就係同名嘅荃灣廣場購物商場，商場裏面有餐飲服飾生活百貨到戲院都應有盡有。
屋苑提供兩種戶型，分別係兩房及三房單位，所有單位都係廳房分明。景觀方面，單位主要望向市內景色及商場平台花園。雖然荃灣廣場屋苑設施唔算多，但都有提供唔少配套，包括室外泳池及兒童遊樂場，啱晒小朋友假日去放電啊！
地址： 荃灣大壩街4-30號
愉景新城 Discovery Park
愉景新城係荃灣區內其中一個最受歡迎嘅家庭上車首選屋苑。兩房戶大約佔四成，全部都係鑽石廳，三房就佔六成有鑽石廳及女子廳兩種間隔。單位實用率大約有八成，屬於高實用率嘅上車屋苑。自設18萬尺平台瀑布花園，營造城市綠洲環境。會所提供遊戲室、泳池、健身室等設施。景觀方面，部份單位望內圓或大帽山山景，絕對係家庭置業首選。
交通方面，由荃灣站出發，經行人天橋步行約10分鐘，即可到達愉景新城，全程均有空氣調節，夏天都唔驚會熱到出汗！屋苑附近亦設有巴士站，穿梭九龍、新界西及機場。購物配套方面，愉景新城最出名嘅就當然係D•Park愉景新城商場，以兒童多元智能學習樂園為主題，絕對係一個地標式親子商場。去完商場行街購物仲可以步行前往荃灣一帶美食區，例如係路德圍等，有唔少有特色嘅美食小店進駐，啱晒一家大細放假消遣。
地址：荃灣青山公路-荃灣段398號
鄰近荃景圍
荃灣荃景嘅物業依山而建，位於山腰嘅位置，環境幽靜。雖然唔算鄰近地鐵站，但附近有為數不少嘅巴士及小巴網絡，無論係接駁到荃灣西站或荃灣港鐵站，抑或係往來港九新界，其實交通都尚算方便。如果想喺荃灣區内上車，荃景圍一帶主打細單位嘅屋苑，絕對係一個唔錯嘅選擇，非常適合一班「首置大軍」！
荃灣中心 Tsuen Wan Centre
荃灣中心位於荃灣荃景圍半山，係新界西其中一個「首置樂園」，因為比起市中心嘅單位相對較為便宜，而且環境恬靜係年輕上車客嘅首選。荃灣中心單位開則實用，主打一至兩房單位，特別吸引二人家庭，當中以翠綠山景單位最受歡迎。
屋苑設有基坐商場，巴士、小巴站等交通配套，方便住客接駁荃灣西站或港鐵荃灣站。荃灣中心亦都可以以天橋貫通荃灣市中心，可以直達各個區內大型購物商場。屋苑配套方面，附近有兒童遊樂場、小型足球場、公眾泳池等設施，都係唔少家庭嘅選擇嚟㗎！
地址：荃灣荃景圍99號
荃景花園 Tsuen King Garden
位於荃景圍嘅荃景花園，交通配套相對方便，鄰近巴士總站及愉景新城，亦都有行人天橋直通港鐵荃灣站。屋苑開則方面，主打兩房及三房開則，實用率超過八成。
喺荃景花園出發，只需要步行幾分鐘，就會到達大型購物商場愉景新城。愉景新城設有唔少嘅兒童主題設施。再行多幾步就到荃灣市中心，美食及消遣娛樂配套應有盡有！
地址：荃灣荃景圍84號
荃威花園 Allway Gardens
荃威花園絕對係區內最熱門嘅上車屋苑，屋苑主打兩房間隔，廳房設計冇樑柱位及窗台，平均400至500尺左右，實用率高達九成，加上大房大廳間隔，非常罕有！屋苑位置依山面海，環境清幽，而且中低層住戶已經可以飽覽荃灣嘅美景及山景，上車盤價錢，可以享有以上嘅優點，絕對係值回票價！
交通方面，雖然唔算鄰近地鐵站，但屋苑樓下已經設有巴士站，可以直出港九新界各區，仲有巴士來往荃灣地鐵站及荃灣西地鐵站，車程都係只需要約3分鐘。加上生活配套充足，包括超級市場、食肆等，絕對具備小社區嘅配套。
地址：荃灣荃景圍195號
錦豐園 Kam Fung Garden
錦豐園設有兩座，主要開則兩房或三房單位，間隔算係正正方方，屬實用類型。二部份嘅單位更可以享有綠油油嘅山景，其他單位就以樓景為主。屋苑設立住客會所，配套包括室外游泳池及其他運動設施。
交通方面，錦豐園位於荃景圍嘅山腳，屋苑前面嘅象鼻山路有多條嘅巴士同埋小巴路線，可以接駁荃灣區內唔同嘅地點，例如係鄰近荃灣站嘅南豐中心。另外，由錦豐園出發往愉景新城都係10分鐘內嘅路程就可以行到，絕對方面日常起居生活。如果唔想搭車嘅話，可以喺旁邊嘅荃德花園商場進行日常購物。
地址：荃灣青山公路-荃灣段458-466號
荃德花園 Tsuen Tak Gardens
荃德花園係荃灣市其中一個備受二至三人家庭歡迎嘅屋苑，門檻較低，戶型亦都相對大眾化。屋苑位於荃景圍山腳，設有五座，全部單位均屬兩房細單位，間隔方正，係標準上車戶型。景觀方面，大部份單位都係望樓景。適合追求寧靜，享受二人世界嘅上車戶。
配套方面，屋苑具備住客泳池及網球場等運動設施。屋苑基座荃德花園商場設有不同小店及食肆，雖然數量唔算多，但都足以應付日常生活需要。交通方面，荃德花園有專線小巴往返荃灣市中心，方便來往市中心嘅大型購物中心或街市。另外，屋苑附近嘅青山公路荃灣段都有唔同嘅巴士站可以來往港九新界。
地址：荃灣荃景圍208號