無論係上車定換樓，相信一眾爸爸媽媽喺揀樓時都會優先考慮小毛孩嘅需要。現時香港大約只有四成屋苑可以飼養寵物，主人們搵樓時難免會頭痛，因為一嚟搵樓難，二嚟怕周遭唔夠地方俾寵物放電，三嚟又怕小毛孩「汪！」「喵！」幾聲就俾鄰居投訴。荃灣一向出名好住，當中亦不乏寵物友善嘅荀盤，今次我哋就為各位正在煩惱搵咩樓嘅主人們整合咗荃灣嘅熱門寵物屋苑，幫你為主子尋找一個”pawfect” home ！
一眼睇晒八個荃灣熱門寵物屋苑：
翠豐臺
碧堤半島
爵悅庭
寶雲匯
立坊 H cube
樂悠居
荃灣中心
荃德花園
🐾🐾🐾🐾🐾🐾🐾🐾🐾🐾🐾
翠豐臺
翠豐臺係主打中小型單位嘅大型屋苑，一共有四座，擁有六星級豪華會所，最重要嘅係允許飼養寵物，係不少毛孩父母嘅首選。單位實用面積由424呎至632呎不等，大部分都係兩房間隔，景觀開揚，部份單位甚至望到全海景，閒時抱住小毛孩喺窗前遠眺青衣睇海景，溫馨極致！屋苑有平台會所供住戶休憩，主人可以帶住毛孩落樓散步，愜意方便。
屋苑附近嘅荃灣中心商場亦設有多間寵物美容及寵物用品店，方便主人去補給貓糧狗糧。另外屋苑亦鄰近南豐紗廠，南豐紗廠係寵物友善區，小動物不僅可以落地行，更可以跟住主人進入大部分嘅餐廳。南豐紗廠嘅餐廳幾乎間間都有寵物餐牌，啱晒一家大細假日行嚟食嘢。呢度有冷氣嘆，環境舒服，動物就算係喺地上行路都唔會太熱同辛苦。假日雖然有好多人會帶住寵物嚟，但唔會有異味，毛孩們更可以喺度一齊同其他貓貓狗狗玩，係一個值得推薦嘅貓狗聚腳點 ！
地址：荃灣安育路1-2號
碧堤半島
有啲小毛孩未必鍾意太吵太雜嘅地方，其實除咗荃灣市中心，荃灣周遭地區亦有既清幽又近市區嘅屋苑。位於深井附近嘅碧堤半島環境清靜，靜中帶旺，距離荃灣市區大概13分鐘車程，唔算太偏僻。碧堤半島一共有八座，大部分單位享有大露台同海景，實用面積由515呎至1,961呎不等。屋苑嘅其中一個賣點係歐陸格調嘅會所，閒時同寵物一齊喺園林廣場和游泳池旁散步，充滿渡假風情啊！
碧堤半島旁邊有海濱長廊，喺放狗嘅好去處。長廊地方寬敞，走動空間較大，所以有唔少養寵物嘅人都會帶毛孩嚟散步或跑步，享受親子樂。平時就算唔出市中心，屋苑樓下亦有碧堤坊商場，商店食肆應有盡有。由於該處係養寵物人士嘅天堂，附近設有不少寵物美容用品店，可以隨時落樓幫毛孩剪個靚毛！
地址：深井青山公路深井段33號
爵悅庭
爵悅庭係荃灣嘅服務式住宅，屋苑大堂走廊嘅裝潢較華麗，適合想為毛孩提供優質生活嘅主人們。爵悅庭一共有四座，實用面積由360呎至1,675呎不等，同樣都係允許飼養寵物。 按此了解更多關於爵悅庭嘅基本資訊>>
地址：荃灣楊屋道90-114號
立坊 H cube
立坊係另一個服務式住宅之選，只有一座，實用面積由277呎至1789呎不等。屋苑主打小型單位，適合有養小動物嘅二人或小型家庭。 按此了解更多關於立坊嘅基本資訊>>
立坊臨近荃灣公園和荃灣海濱公園，兩者都係步行約10分鐘就到達，方便快捷！平時亦可以帶住毛孩步行至附近嘅寵物友善商場消遣，例如荃灣廣場、荃新天地一期和二期。毛孩可以陪住主人購物逛街娛樂，共聚美好時光！
地址：荃灣楊屋道118號
寶雲匯
寶雲匯位於荃灣半山，一共有九座（不設第四座），僅供210個住宅單位。每座一梯兩至三伙，唔算高密度，所以就算屋企嘅小毛孩太活潑，叫得好大聲，都唔怕會嘈親隣居們。單位實用面積由707呎至1,107呎不等，樓底高達十呎多，以三房間隔為主，另設有工人房同環保露台，適合想為寵物提供寬敞空間活動或飼養大型犬嘅主人們。屋苑被翠綠群山包圍，並設有五萬呎平台花園，夠晒空間俾毛孩呼吸新鮮空氣同放電。
由寶雲匯去荃灣港鐵站及市中心大概需時5分鐘，另外屋苑亦有居民巴士站，8至13分鐘就可以到達荃灣港鐵站。如果平時想去市區嘅寵物友善商場或寵物公園，如鄰近嘅荃灣公園和荃灣海濱公園，都唔怕會好唔方便。
地址：荃灣荃錦公路98號
樂悠居
樂悠居其中一個賣點係可以飼養寵物，屋苑靜中帶旺，係個適合小動物居住嘅地方。屋苑主打一房單位，同時亦有部分兩至三房單位，實用面積由347呎至604呎不等。45樓設有約一萬平方呎嘅空中花園，不妨抱住小毛孩到平台欣賞汀九橋海景以及荃灣市區景！ 按此了解更多關於樂悠居嘅基本資訊>>
步行10分鐘可以到達荃灣廣場、荃新天地一期和二期等寵物友善商場，同時亦可步行10至11分鐘到荃灣公園和荃灣海濱公園俾毛孩放電散步，完全唔使愁冇地方俾小毛孩去！
地址：荃灣楊屋道138號
荃灣中心
作為荃灣首置之選，荃灣中心一直係不少細家庭嘅首選。屋苑一共有十九座，有一至三房單位可供選擇，實用面積由233呎至769呎不等。屋苑一期有住戶私人平台花園，二期亦有平台花園，一落樓就可以俾毛孩喺平台散步嬉戲，寵物開心之餘主人亦能感到輕鬆方便！按此了解更多關於荃灣中心嘅基本資訊>>
除咗可以到區內嘅寵物友善公園，住戶亦可以帶住寵物到隣近嘅南豐紗廠、荃灣廣場以及荃新天地消遣玩樂，大把地方選擇！
地址：荃灣荃景圍99號
荃德花園
如果想入場費平啲嘅話，不妨可以考慮下主打兩房單位嘅荃德花園。荃德花園一共有五座，實用面積由287呎至341呎不等，適合有養寵物嘅小型家庭。屋苑設有一個大平台花園，環境寬闊，對養寵物人士較為便利。因為係市中心，所以交通非常方便，附近亦有唔同商店和康樂設施，係個熱鬧嘅小區。
平時主人們可以帶毛孩到隣近嘅南豐紗廠以及多個寵物友善商場玩樂，亦可間唔中搭車到荃灣公園俾寵物放電，車程需時7分鐘左右。
地址：荃灣荃景圍208號
🐾🐾🐾🐾🐾🐾🐾🐾🐾🐾🐾
⚠️寵物友善屋苑注意事項：
- 以上資料參考咗屋苑嘅大廈公契，穩陣起見，建議主人們喺買樓前向物業管理處或業主查詢，再次確認該大廈允許飼養寵物。
- 即使大廈公契允許飼養寵物，主人們都要多加注意寵物嘅行為，避免對其他住客構成滋擾。
- 如果係攜犬租屋嘅話，租屋前要問準業主意願之餘，亦要小心避免毛孩整花破壞間屋。