喺香港，買樓並唔簡單。有好多人基於經濟因素或唔想俾供樓綁死，都會選擇租樓住。但係個個都租屋，唔通個個都識租屋咩！尤其對新手嚟講，面對多不勝數嘅租盤同繁複嘅租屋程序，難免會感到困惑。如果你想租樓住，一於跟住呢篇租屋攻略，快速了解租屋流程和注意事項，避開中伏位！
一眼睇晒【香港租樓六大流程】：
搵租盤 >> 睇樓 >> 議租 >> 簽約 >> 支付按金及打釐印 >> 入伙
↓↓↓↓↓↓↓↓↓↓↓↓↓↓↓↓↓↓↓↓↓↓
🔍第一步：搵租盤
租樓首先當然要搵合心意嘅樓盤，無論係價錢、交通定還是周邊配套，都要花時間認真考慮同取捨，咁之後先可以住得開心稱心！
想搵租盤有好多方法，其中兩大途徑係正規嘅地產代理公司和網上搵樓平台。搵樓平台上嘅租盤普遍為業主自讓盤，呢類盤需要你花更多精力篩選判斷，亦要自行處理所有事項，但就唔需要佣金。
相反地產代理掌握嘅房源較多，配合專業知識，代理可以按照你嘅需求匹配租盤俾你，並會幫你處理之後嘅租屋程序，但就需要支付佣金予地產代理。
即睇地產代理公司提供嘅租盤：美聯物業>> 
⚠️搵盤注意事項
- 持牌地產代理受監管局規管，而且雙方會簽訂《地產代理協議》，有更大保障。如果係自行於網上物色租盤，需要多做資料搜集，有需要時尋求專業建議，單獨睇樓嘅話亦要小心人身安全。
- 業主盤雖然唔洗俾佣金，但有部分業主唔熟悉市場，定價可能會比代理盤高，需要先衡量會否比佣金貴，然後再決定搵業主盤定代理盤。
🔍第二步：睇樓
網上有很多照騙，樓盤照片亦唔例外，所以穩陣起見當然要親身到租盤單位視察房屋嘅真實狀況，順便了解埋周邊嘅居住環境、人流以及安全問題等等，咁就萬無一失！
⚠️睇樓注意事項
- 租盤座向好緊要，如果向西嘅話要小心熱同曬，可能要長期開冷氣，令電費變貴，而向北嘅話則小心容易潮濕發霉，一般坐北向南樓係最理想。
- 睇樓唔止要睇房間間隔同座向，同時都要睇清細節位，如有冇漏水、潮濕、滲水、甩灰、牆裂，以及沖廁去水位同門窗有冇問題。如果想檢查清楚，可以落完雨後睇樓。
- 如果係空空蕩蕩嘅「清水房」，可以問下業主會否包傢俬同電器，具體包邊啲。
- 注意建築面積同實用面積嘅分別，建築面積係指公共空間面積，而實用面積則指單位嘅實際面積。
- 如果唔想租到凶宅，可以去凶宅網check下（地產代理有責任告知單位是否為凶宅）。
- 如經地產代理搵樓，睇樓前需要簽睇樓紙，防止租客之後透過業主或另一個代理租該房子，所以千奇唔好搵多個代理睇同一個租盤啦。
- 睇樓最忌衝動行事，睇多啲盤做比較先決定。
📝第三步：議租
睇啱樓，就可以簽約前商議租金啦！如果係經地產代理搵樓，可以委託代理作為中間人幫忙議租，不然就需要自行同業主本人商議。
⚠️議租注意事項
- 準備好入息證明，例如稅單、糧單或工作證明，以確保自己可以遵守租約，準時交租。
- 可以叫業主出示銀行發出嘅出租同意書，避免因業主斷供而拎唔返按金嘅可能性。
- 可以提前同業主商議好合約期後點樣退還按金，避免之後被無理扣除按金嘅情況。
- 通常業主會提供為期三日至兩個星期嘅免租期，讓租客喺呢段時間搬入。法例並冇硬性規定免租期，業主同租客可以協商免租期，同時租客亦可拜託代理幫忙同業主協商。
📝第四步：簽約
仲差一步就租到樓！簽約真的很興奮！興奮還興奮，簽約時記得要謹慎，睇清條款，以防中伏。一般租盤嘅話會先簽一份臨時租約，過咗冷靜期後再簽正式合約，要注意簽咗臨時租約後撻訂嘅一方需要支付一個月租金和全數代理佣金。
⚠️簽約注意事項
- 如經地產代理搵樓，代理有責任代雙方草擬好租約，如自行上網租屋，則可能需要自己準備租約。
- 簽正式合約時需要業主本人同租客本人在場，而且合約要明確寫下所有信息，一式兩份（業主與租客各持一份）。
- 簽約前記住要核對身份，確定簽約嘅業主係房主本人。地產代理會交代相關住宅務業的資料同幫忙查冊，以核實業主身份真偽，查明業主業權，如自行上網租屋，記得要自行上網到土地註冊處查冊。
- 正式租約係「一年死、一年生」，頭一年為死約，如一方退租就要賠償一年內剩餘月份嘅租金，第二年開始為生約，任何一方退租都只需一個月前通知，唔需要賠償。
- 注意租約上所有費用分配，一般租金已包差餉、地租及管理費，水電煤費租客自付。另外亦要留意單位維修嘅責任和費用係由業主定還是租客承擔。
💰第五步：支付按金及打釐印
租客可以喺簽約嘅時候準備定「兩按一上」，即兩個月租金為按金以及一個月租金作上期。如經地產代理搵樓，業主同租客需要共同平均承擔一個月嘅租金作代理佣金，因此記得要額外準備多半個月租金啦。
俾完按金，都仲未完成晒成個租屋流程㗎！簽完正式合約後，租約需要於30日內遞交至稅務局加蓋印花，俗稱「打釐印」。印花稅一般由業主同租客共同承擔支付，會根據租期長短收取0.25%–1%不等嘅釐印費。打完釐印，租約就會正式成為具法律效力嘅文件，一旦日後有爭拗，租約就可以成為法庭上嘅呈堂證供，對業主同租客雙方都有法律保障。
⚠️按金注意事項
- 如無意外，租約完結時可以退還兩個月嘅按金。如擔心之後攞唔返全額按金，正如上述所言，簽約前可以提前同業主商議合約期後退還按金嘅細節。
⚠️打釐印注意事項
- 如經地產代理搵樓，代理會幫忙打釐印，並為業主同租客分別打印一份印花証明書。如自行上網租屋，業主同租客雙方都可以用個人「稅務易」帳戶網上打釐印，無論係邊一方打，同時為雙方租約正本加蓋印花並各自保存一份印花証明書就最穩陣啦。
- 遲打釐印會收取原有稅項2到10倍嘅罰款額，所以記得要30日內遞到稅務局打釐印。
- 萬一業主唔肯打釐印（有機會係因為想逃稅或非法出租），租客仍然可以自行網上打釐印，但需獨自承擔所有費用。
🏠第六步：入伙
搞掂晒所有嘢，就可以拎住條鎖匙準備入伙啦！
⚠️入伙前注意事項
- 為咗完租後可以攞返全額按金，交屋嘅時候記得要檢查屋內大大小小嘅瑕疵，無論係傢具、牆壁定門窗，都要一一check清楚，有問題嘅地方影相作記錄，以証明瑕疵喺起租前已經存在，以免完租後業主問起，無法證明。
- 如果租約唔包水電煤費，可以影相或抄錶記低入伙時嘅度數，了解水電煤嘅計算方法，同時日後亦可作為參考，萬一有異常用量就可以馬上同業主講。
- 提前同業主溝通清楚能否鑽牆或做微細改動，定還是需要保持原貌咁交還房屋。