「由幾時開始間屋多咗咁多嘢？」
呢個問題相信你都問過自己好多次，尤其當你嘅「蝸居」雜物愈多，空間愈少嘅時候，就覺得單位冇想像中咁實用，雖然唔可以將間屋變大，不過可以教你10個收納儲物嘅小貼士，增加返屋企嘅空間感：
1. 鞋
「開心買鞋，唔開心都買鞋」
買到成屋都係鞋，但係都仲繼續買緊？想騰出更多空間放鞋，先唔好將鞋平排放埋一齊，而係用鞋架將鞋上下疊住咁放，就可以騰出多一倍嘅位置。
2. 行李箱
你有冇諗過大型家具嘅背後，係個好好存放大型行李箱嘅空間？例如唔好將梳化完全貼牆，而係利用嗰個空間擺放行李，咁就夠晒Perfect啦！
3. 冬天衣物
利用真空收納袋，將大型冬天衣物縮細後，再放入行李箱，就可以完美隱藏啦！
4. 廚房電器
攪拌機、麵包機、氣炸鍋等等，可能幾個月先用到一次嘅大型電器，有時都幾嘥位㗎！如果覺得放入櫥櫃拎出拎入好麻煩，可以試下用「摺合式多用途服務用車」存放，拎嘢方便咗，自然煮咩都得心應手啦！
5. 歷年來未用過又唔捨得抌嘅生日禮物
呢堆物品可以用收納箱，一次過存放喺貯物櫃後面或者貯物櫃裡面大量未用過嘅空間，例如衣櫃頂或者衫堆下嘅位置。
6. 額外嘅床單
要存放多出嘅床單，可以摺好後放入枕頭袋，慳位之餘，下次成套換嗰陣，就方便好多喇。
7. 健身器材
香港地寸金尺土，未必個個屋企奢侈到可以擁有自己嘅 Gym 房，加上好多健身器材都三尖八角，好難擺得整齊。呢個情況可以將啞鈴、槓鈴片、壺鈴等統一放入四方形箱，營造整齊外觀；健身踏板唔用嗰陣可以打直攝入櫃邊；阻力帶同瑜伽墊就可以掛喺牆，啲帶唔會繞埋一堆之外，又唔駛搵地方放瑜伽墊；健身球大大嚿咁阻埞，每次用嗰陣攞出嚟泵氣再放氣又好麻煩，其實唔用嗰陣可以攞佢當櫈坐，又或者收喺枱底就可以慳位啦！
8. 必需品
喺洗衣機或者馬桶上面安裝，就可以騰出更多位置，擺放清潔用品同廁紙呢啲常用必需品。
9. 無需要嘅物品
當你歸類出冇用嘅物品嗰陣，其實你已經可以將佢哋整理好，再放上 Carousell 賣，賺返少少外快。不過講就容易，做就難，如果未捨得賣出去嘅嘢，有個終極方法可以令你知道呢樣物件對你嘅重要性，就係試下將佢放埋一邊，睇下過咗段時間仲記唔記得佢嘅存在～
10. 其他
無論間屋幾細都好，要騰空多啲位置，其實冇想像中咁難！可能只需要換一個有儲物空間嘅床架，又或者搵方法整理好啲物件就搞掂！如果你係想有多啲內置儲物空間，平平地翻新下間房都係個唔錯嘅選擇。
裝修工程：
不過要留意，如果你係想整地台、起牆或者打通房間嘅話，就記得要遵守同符合房屋署嘅規定啊！如果諗埋長遠需要，買間大啲嘅屋會係個更好嘅方法。即使你而家未必需要多一間房，不過考慮到日後生小朋友，就可以將多出嚟嘅間房改成BB房，講緊可能畀多約二百萬嘅價錢，就可以多一間房，咁樣計法就化算好多啦！
2房單位：
有時候只要俾啲時間執下屋，就可以令間屋更加整齊，不過有時亦代表你可能要換間更大嘅單位啦！要間屋整齊乾淨，其實有好多方法，如果一定要揾個扚起心肝行動嘅理由，其實好多研究都顯示執屋有助減壓，可以改善身心健康㗎！你都快啲行動啦！
