仲有幾日就到父親節，未安排節目？不如跟住【父親節自駕遊懶人包】玩！冇車？咪租囉！趁著父親節租車載住爸爸周圍去，答謝佢一路以嚟嘅「父」出。
即睇5條熱門路線 + 租車泊車攻略：
↓↓↓↓↓↓↓↓↓↓↓↓↓↓↓↓↓↓↓↓↓↓
🔥路線5：屯門取車 > 深井 > 汀九、屯赤隧道 > 下白泥 > 流浮山
📍第一站：屯門取車
大西北唔係淨係得牛㗎！同爸爸一齊去探索下啦！即睇屯門精選租車公司 HK Fun Drive>>
📍第二站：深井
攞完車想食好西，可以用九分鐘車程帶呀爸去深井食馳名燒鵝。
📍第三站：汀九灣泳灘 ＋ 汀九村／屯赤隧道浩和街
汀九灣泳灘 + 汀九村
下午最啱一家人周圍去欣賞景色！ 去完深井食嘢，就最啱去埋汀九玩。帶住爸爸喺汀九灣泳灘散步，欣賞汀九景色，坐喺海灘上嘅小草地共聚家庭樂。離開時，走在階梯中間嘅小道上欣賞兩旁嘅純樸村屋，再欣賞遠處嘅大海及汀九橋，呢個父親節愜意極致。
圖片來源：康文署
地址：青山公路汀九段11咪
泊車：可以帝景酒店迴旋處嘅咪錶車位或者青山公路汀九路段嘅咪錶車位泊車。
屯赤隧道浩和街
被譽為「港版邁阿密」嘅屯赤浩和街亦係一個值得去嘅地方，由於交通唔太方便，所以人們通常都係自駕嚟。 吹住海風，再配合草地同一列棕櫚樹影相，就當係去咗外國旅行㗎啦！
地址：新界屯門浩和街
泊車：浩和街附近並冇泊車咪錶，需要自行斟酌。
📍第四站：下白泥日落
既然有㗎車，當然要去遠啲嘅地方，自駕去下白泥就最為方便啦！ 五點幾可以去下白泥附近嘅鴨仔坑士多食個下午茶，坐住等睇日落。如果六點幾先到，亦可到下白泥嘅泥灘欣賞黃昏美景。
地址：新界元朗流浮山
泊車：可以泊喺下白泥鴨仔坑沙灘邊，要注意唔好影響到居民。另外鴨仔坑士多自設停車場，泊完車去士多俾錢就可以。
📍第五站：流浮山晚餐／綠田園燒烤
睇完日落，可以沿住稔灣路去到流浮山正大街，嚟個海鮮大餐。 街道兩旁有十幾間海鮮酒家，爸爸可以喺食肆出面揀選自己想食嘅海鮮以及烹調方法，一家人開心度過父親節嘅晚上。
地址：香港新界元朗流浮山正大街
泊車：流浮山正大街附近設有停車場，有充足嘅車位，喺部分酒家用膳後可以攞返泊車費。
圖片來源：綠田園Facebook專頁
如果想BBQ，可以前往綠田園嘅大型有蓋露天燒烤場，埸地有燒烤餐提供，唔洗自己花時間買食物。 綠田園有一個天然湖泊以及多項遊樂設施，你可以同家人踩水上單車、餵動物同玩攤位遊戲，享受家庭樂。
地址：天水圍沙江圍側（天華路入）
泊車：綠田園設有免費停車場。
