仲有幾日就父親節，未安排節目？不如跟住【父親節自駕遊懶人包】玩！冇車？咪租囉！趁著父親節租車載住爸爸周圍去，答謝佢一路以嚟嘅「父」出。
即睇5條熱門路線 + 租車泊車攻略：
↓↓↓↓↓↓↓↓↓↓↓↓↓↓↓↓↓↓↓↓↓↓
🔥路線1：觀塘取車 > 將軍澳 > 清水灣道 > 布袋澳
📍第一站：觀塘取車
夏日熱焫焫，要俾爸爸嘆足全日，最好就係坐車玩。
即睇觀塘精選租車公司>>
Autobright Company Ltd
Noah Auto Limited
Carchoice Brothers
📍第二站：將軍澳海濱公園午餐
攞完車，想填飽個肚可以去將軍澳海濱公園。露天茶座、特色餐廳定Cafe？正餐定輕食？總有一間啱晒一家大細嘅口味！✨小貼士：可以喺度食少少，再買啲嘢入去之後嘅景點野餐。
圖片來源：instagram@haki_doggie
地址：將軍澳唐俊街&唐賢街
泊車：海濱公園附近設有多個停車場，包括澳南海岸停車場、海天晉滙停車場、藍塘傲停車場以及翩匯坊停車場等，大量車位，唔愁冇位！
📍第三站：清水灣道
清水灣道一帶嘅郊外景點都被稱為自駕遊必去聖地，由大草原到海灘都唔使攀山涉水，揸車直達清水灣二灘、相思灣、大坳門、龍蝦灣、布袋澳，可以輕鬆咁嚟個聖地巡旅！
清水灣二灘
沿停車場旁有樹蔭嘅長樓梯直落，就會見到寬敞以及水質極佳嘅沙灘，當去旅行㗎啦。二灘嘅設備應有盡有，包括小食亭、燒烤區、更衣室、淋浴設備、洗手間同浮台。唔落水都可以喺沙灘欣賞西貢嘅景色，曬吓太陽，讓爸爸chill chill。
地址：清水灣大坳門路
泊車：清水灣二灘設有停車場，假日可能會車位短缺，如冇位可嘗試去旁邊嘅一灘睇睇有冇泊車位。
相思灣
相思灣近年成為水上活動勝地，有獨木舟出租，可以划去綠蛋島，啱晒鍾意同陽光玩遊戲嘅爸爸。此海灘亦允許寵物進入，想同小毛孩一齊慶祝父親節嘅話不妨嚟呢度海邊走走！
地址：清水灣道相思灣路
泊車：相思灣附近有一片大空地任泊，車位比清水灣二灘多。
大坳門
大坳門有一大片草地，係放風箏熱點，啱晒一家大細嚟野餐、放風箏，享受家庭樂。公園內設有小食亭，可以購買飲品、食物同風箏。✨小貼士：想野餐嘅話可以喺APM超市或軍澳海濱嘅Cafe買定嘢食先。
地址：清水灣郊野公園大坑墩
泊車：大坳門路停車場提供約40個免費車位。
龍蝦灣
龍蝦灣亦係另一個隱世野餐同放風箏嘅好去處，不同於大坳門，龍蝦灣三面環海，所以更可以吹住海風享受釣魚樂。如果爸爸鍾意釣魚嘅話，龍蝦灣就啱哂佢嚟邊釣魚邊休息啦！
地址：清水灣郊野公園大坑墩
泊車：可以泊喺清水灣郊野公園停車位，但只有大約20個位，可能會車位短缺。
📍第四站：布袋澳晚餐
尾站嚟到有「布袋」島形嘅布袋澳村，係一個簡樸嘅漁村。有不少棚屋之餘，亦有海鮮酒家提供海鮮餐。 大家不妨帶爸爸嚟呢度吹吹海風，感受漁村嘅古早風貌順便享用晚餐！
地址：新界西貢布袋澳村
泊車：布袋澳村周圍並冇大型停車場，所以只能泊喺路邊，如果人多嘅話可以泊喺山腳附近，再行入村。
