焫焫焫焫焫焫著！炎熱天氣下，除咗人要避免中暑，車都要小心中暑。一旦車件高溫曝曬，就有機會導致汽車老化，令㗎車貶值之餘，更需要花大量財力和時間維修。撞正雨季，亦要小心車身會留下雨跡，毀咗愛車嘅美貌。夏季揸車泊車難免會日曬雨淋，唔想㗎車咁快壞，就一於跟住呢篇手冊，快速了解各種夏日養車注意事項！養靚㗎車，咁就去邊「暑」都得啦！
🔍夏日養車手冊
－ 高溫對策
－ 雨水對策
↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓
☀️🚘高溫對策
香港嘅夏天又熱又焗，體感40度乃是一件好正常嘅事。喺咁高溫嘅情況下，車內嘅空調系統同散熱系統可以好好控制汽車嘅溫度平衡，防止車廂過熱。如果夏天想要對抗酷熱高溫，就要保養維護好呢兩個系統啦！
1. 空調系統
試想像一打開車門，一股熱氣迎面而來，真係完全唔想坐入去啊。對於各位司機嚟講，特別喺夏天，冷氣係大家不可或缺嘅神隊友，為咗避免冷氣呢個時候先至嚟罷工，平日當然要做好冷氣保養啦！
1.1. 冷氣濾芯保養
夏天啦，打開一年冇開過嘅冷氣，發現風口位多咗唔少灰塵添！如果唔及早清洗，除咗會令冷氣唔夠凍，灰塵細菌更有機會令車廂產生異味，乘客吸入空氣後可能會感不適。
冷氣保養嘅程序好簡單，首先可以檢查空調系統，例如睇下電器設備同管路嘅運作正唔正常。檢查完之後亦可以到車房清潔冷氣系統，順帶定期清洗或更換冷氣濾芯，咁就能夠有效率地清潔及保養好汽車嘅空調系統。
1.2. 雪種檢查
除咗最基本嘅冷氣設備，雪種亦會影響汽車嘅製冷效果。如果清潔檢查完冷氣系統仍然覺得冷氣唔涼，就可能係唔夠雪種或漏雪種。如唔夠雪種，可考慮自行添加雪種。至於漏雪種，連接冷氣嘅管路或接口破損係漏雪種嘅成因之一，如果唔想雪種出現問題，可以定時檢查呢啲部分，咁就算有問題都可以及早發現解決到啦！萬一懷疑或發現漏雪種，建議可以交俾車房處理，因為就算加咗雪種都好快又會漏走。
2. 散熱系統
散熱系統有好多配裝，當中包括銻水箱、水喉、水膽以及水箱水。無論係邊個配件損壞，汽車嘅散熱功能都會受到影響，所以平時要多做檢查保養，咁就唔怕㗎車夏天會熱到半路拋錨。如果想散熱得快啲勁啲，不妨可以考慮改裝部分汽車零件，咁就幾熱都唔怕啦！
2.1. 銻水箱
銻水箱係整個散熱系統嘅主要配件之一，被視為降溫三寶嘅其中一寶。作為汽車水箱散熱器，水箱嘅作用係冷卻並吸收缸體嘅熱能，防止發動機過熱。如果想要降溫，與其保養原裝水箱，一般人會偏向改裝銻水箱。改裝咗嘅銻水箱四面由銻造成，更能受壓，可以灌入及流動更多水量；原裝水箱嘅頂部和底部都係用塑膠嵌入，比較易老化。對比兩者，改裝後嘅銻水箱較唔容易谷爆，散熱效能亦更快，適合經常使用或暴曬嘅汽車。
2.2. 水喉
水喉係降溫三寶中嘅另外一寶，係引擎倉內連接水箱嘅喉管。原裝水喉其實好耐用，保養得好嘅話行十萬公里以上都仲得。然而無論水喉耐用性有幾高，面對炎熱天氣，再加上如果揸咗有一段時間嘅話，就會加速水喉嘅膠質老化、硬化或損耗，有機會爆裂造成水箱水泄漏。如果唔想突然拋錨，就要定期搵師傅檢查同保養維修啦！一般改裝咗嘅水喉會有更多層防爆，質料較好，能抵受高壓力與高熱力，可以視乎行車習慣睇下需唔需要改裝。
2.3. 水膽
水膽亦係降溫三寶之一，當引擎溫度高達80度嘅時候，水膽內嘅水銀會澎漲，水膽繼而會打開，令水循環流動，幫助散熱。除咗日常檢查保養，如想提升汽車動力表現及保護力，可以考慮改裝成較低溫度就會開啟引擎泠卻循環嘅低溫水膽。
2.4. 水箱水
避免引擎過熱，絕對唔可以忽略水箱保養嘅重要性。除咗保養或改裝水箱外，水箱水亦需要定期檢查更換，如果唔係水箱就起唔到冷卻嘅作用㗎啦！水箱內嘅水並唔係真正嘅水，而係冷卻液（亦可叫做防凍液），其含有油性成份嘅配方可以用嚟降溫同潤滑水道，避免生銹。水箱水更換期大約為一至兩年，建議每年定期檢查水位，更換水箱水，避免揸揸下車冇晒水，引擎蓋突然冒煙過熱。
更換水箱水小貼士：
1. 散熱系統喺炎熱天氣下會負荷變大，建議喺夏天嘅時候檢查並更換水箱水，令水箱冇咁大負擔。
2. 如果突然水箱冇水，可以將冷氣轉成暖氣幫助散熱，冇水箱水嘅話可以暫時添加普通水頂住先，但要注意唔好加太多。
3. 如果駕駛時因爲種種原因過熱，小心起見最好唔好打開水箱蓋，以免水箱內嘅滾水彈射出嚟。
無論係原裝定改裝配件，都需要好好打理保養，咁先可以令汽車嘅散熱系統喺呢個夏天發揮得最好！
🌧🚘雨水對策
夏天除咗天氣酷熱，去到雨季仲經常會落大雨。天雨路滑，如果唔好好保養車身同雨刷，除咗影響汽車外觀，亦有可能會影響行車視線，駕駛時構成危險。想知點樣減少雨痕同檢查雨刷，一於繼續睇落去啦！
1. 汽車噴膜
夏季好難避免落雨揸車，成日俾㗎車淋雨好容易會增加車身嘅雨痕，破壞美觀。想要對抗雨痕，可以先確保汽車嘅蠟層有效，令車身少啲接觸雨水。其中兩個方法係使用驅水噴膜產品及去車房做鍍膜。
市面上有唔同類型嘅噴膜產品任君挑選，可按照車型、持久性和作用效果（如驅水效果和防污效果）揀選最適合自己嘅噴膜。如果唔想自行噴膜，亦可考慮到車房做鍍膜。鍍膜有分為結晶型鍍膜同非結晶型鍍膜，要注意非結晶型鍍膜同部分噴膜產品嘅效果十分相似，需自行衡量性價比。如果出去做鍍膜，建議做結晶型鍍膜，效果會較非結晶型鍍膜厚同硬。
即睇更多噴膜相關搜尋嘅汽車配件或服務>>
即睇更多噴膜相關搜尋嘅汽車配件或服務>>
2. 雨刷保養
落雨嘅時候，雨刷係司機嘅得力助手，因為雨刷刮唔乾淨嘅話會影響行車視線，構成潛在風險。想要保養好雨刷，平時就要定時檢查，喺清潔完雨刷後，用手指摸一摸雨刷嘅橡膠，睇下橡膠葉片嘅彈性有冇受損。如果發現葉片有老化、硬化又或者係裂咗，就要及時更換雨刷片啦。
平日保養好車身同雨刷，做好下雨對策，其實落雨又有咩好怕喎！