每當望住個衣櫃，我都會不由自主問自己：
點解明明啲衫成堆山咁高，我都依然成日覺得自己冇衫著？
而呢個雞毛蒜皮嘅「問題」嘅解決方法，自然就係愈買愈多衫啦。
根據中央社嘅報告，新加坡人平均每年都會買34件新衫，但係就會扔大約27件。而當地國家環境局仲指出，單單喺2016年，新加坡人就扔左139,800噸布料同皮革廢棄物，當中只有7%有做回收，其餘嘅通通都去左焚化爐！而澳洲人喺呢方面都唔好得多，佢哋每年平均買27公斤新衫，足足係全球平均嘅兩倍。
當然，冇人想將啲衫扔哂落垃圾筒，所以好多人都會選擇捐去慈善團體。新加坡人好中意咁做，尤其係聖誕新年嗰排。咁樣做好容易令人自我感覺良好，又可以幫衣櫃大掃除，但係，唔好咁快心安理得住！當地救濟軍每日都接收大約6噸捐贈衣物，但只有8至10%會上架出售。剩低嘅90幾%，當中有部分會送去其他國家，例如馬來西亞同印尼。喺澳洲，得15%嘅捐贈衣物賣得出，其餘嘅衫就算依然好新淨，都係通通都送去堆田區。
更可怕嘅係，現時大部分新衫都係由合成物料造嘅，好似係聚酯纖維、毛滌紗同埋尼龍。換言之，佢哋全部都係由塑膠製造出黎，而塑膠係用成萬年先分解到。就算係棉呢類天然物料，其實都好難分解，因為佢哋係被扔到堆田區，而唔係堆肥堆。而呢個就係舊衫嘅真正「歸宿」。
唉，真係要為所有被遺棄嘅衫褲鞋襪默哀！我哋曾經都當佢哋係寶，著住佢哋同愛人朋友攬攬錫錫。無論係第一次約會、生日派對、番學上堂、見工定係去飲，呢啲舊衫都陪伴住我哋度過好多珍貴時光，幫我哋展示個人魅力，唔多唔少都會聯繫到啲回憶。你話啲舊衫係咪值得更好嘅結局呢？
舊衫點樣處置先算好？
舊衫唔一定淨係得死路一條架。綠色和平建議，處置舊衣物最好嘅方法就係轉贈。但係，可能你冇時間成日坐係二手市場賣衫，又或者冇親朋好友啱用，咁又點算好？呢個正正就係Carousell嘅創辦原因喇。Carousell希望將買賣過程變得簡易，咁你唔啱洗嘅舊物就可以去到有心人手中，待佢如珠如寶啦。
如果你依然係想支持慈善團體，當然係無任歡迎啦！大家可以將舊物出售，然後將收益捐俾佢哋。衣物需要大量人力物力整理，仲可能永遠賣唔出，所以捐錢點都實際過捐衫。
拒絕速食時裝
大家千其唔好忘記最大嘅敵人，就係速食時裝同過度消費！過度消費只會造成更多舊衫，更多廢物，然後就係更大嘅堆田區！要忍住唔買嘢的確唔係咁容易，所以大家可以選擇一個愛護環境嘅買嘢方式，就係唔買新衫買二手衫！
禮拜六日得閒就將舊衫放上Carousell賣，養成個＃星期六賣衫日 嘅習慣，將舊物送到會欣賞佢嘅人手上啦。各位仲可以順便喺Carousell app尋寶，睇下有冇嘢啱心水架。
