產品攝影:你都可以成為Carousell攝影大師

0
895

有無聽過啲人話第一印象好重要?

對於呢句說話,可能你同我嘅睇法會唔同,但係有一樣嘢可以肯定嘅,就係喺Carousell第一印象真係好重要。

吸引買家嘅第一個途徑,就係件產品嘅相片。

當個買家一路碌一路碌,突然間佢隻食指停係半空,望住螢光幕上面,吸引著佢眼球嘅個張相,係個一刻,佢知道自己搵到啦。就好似係Instagram數以千萬計嘅相入面見到一張無懈可擊嘅靚相咁震撼。

係Carousell,我們相信呢種令人驚艷嘅能力係喺每一個人嘅手中…呃…因為張相真係要自己影㗎嘛。但係我地都明白幫件產品影靚相唔係一件易事,不過睇完呢五個秘訣,你就會知道點可以用智能手機都影到一張世界級嘅產品寫真。

成為出色嘅Carousell賣家必備技巧:產品攝影

影低件產品係 點喺Carousell賣嘢 嘅第一步。一齊嚟睇下今次會講啲咩秘訣:

  1. 令產品成為主角
  2. 對焦嘅重要性
  3. 運用「平行-直角法則」
  4. 燈光嘅重要性
  5. 角度嘅重要性

當你學識咗呢五樣嘢,我肯定想買嘢嘅人見到你影嘅相,會忍唔著即刻買。

想即刻係Carousell買返部單反嚟影靚相? 咁又唔洗,一部智能手機已經夠。

秘訣一:令產品成為主角

有無試過係社交媒體上面見到啲相,但係因為張相有太多人,所以搵極都搵唔到個friend?

同樣道理,買家都唔會花時間去研究你係賣啲乜,所以件產品一定要係張相嘅主角。

有兩樣嘢要注意:

  1. 件產品嘅顏色要同背景有對比,令到件產品更突出顯眼
  2. 只係影你賣嘅嘢,唔好比其他唔關事嘅嘢入鏡

睇下下面呢兩張相:

Making your item the focus of the picture enhances your product phogtography
產品攝影秘訣一:等件產品成為眾人目光嘅焦點

係唔係一睇右邊個張知我賣緊啲咩? 張相影得清晰,想買嘅人睇相已經搵到答案。

秘訣二:對焦嘅重要性

首先,你部電話個相機要對到焦。

唔好講笑,out-fo(失焦)嘅相真係網上購物嘅惡夢。大家都會想自己嘅錢用得其所。你會唔會俾錢買一樣睇都睇唔清楚嘅野?

記得係你影相之前,係電話螢光幕上面撳一下件產品,確保已經準確對焦。咁至少Carousell上嘅每個人都知你賣緊啲咩嘛。

呢到係一張準確對焦同一張失焦嘅相。

A picture comparison showing how properly focusing on your product enhances your product photography
產品攝影秘訣二:影相之前記得確保對咗焦,張相影出嚟係清嘅。

你而家明我點解話out-fo嘅相係惡夢啦?

跟住呢個秘訣,係關於一個攝影技巧,叫「平行-直角法則」。

秘訣三:運用「平行-直角法則」

聽落好似好難好專業,鈎起咗讀書時候數學嘅惡夢? 唔怕,我會慢慢解釋你聽。

當你將件產品放係牆前面(同牆平行),咁部電話就應該打直面對件產品(同地面成直角);
當你將件產品放係地下,咁部電話就應該要係半空對正件產品(同地面平行),咁樣做嘅話,就唔會因為奇怪嘅角度,而影響張相嘅美感。

產品攝影秘訣三:運用「平行-直角法則」,確保影出嚟唔會走樣。

秘訣四:光線嘅重要性

一張好嘅相,唔能夠無好嘅光線。只要一路練習,嘗試唔同嘅光線,影出嚟嘅相一定無與倫比。

要做到完美光線,唔一定要有大光燈之類嘅器材。你部電話加埋個太陽就已經夠。不過記著,過度曝光同光線充足係兩回事,唔想搞錯? 就要注意以下呢兩點:

– 係近窗嘅地方影相:將件產品放係窗隔離,光源最好係產品嘅正左或者正右方。

– 避免直接或者強烈嘅陽光:唔好將件產品對正個窗,或者係喺中午嘅時候影相,咁就唔會有過度曝光嘅問題。

如果你好似我咁忙,只有夜晚先得閒,就記得確保間房係有良好嘅光線。

產品攝影秘訣四:充足嘅光線先有靚相。

嚟到最後一個秘訣,睇埋呢個保證你會成為Carousell攝影大師。

秘訣五:角度嘅重要性

有無聽過一句說話:「一張圖勝過千言萬語。」我就係到諗,咁如果係四張圖,又會勝過啲咩呢?

你可以為每件產品上載四張圖片,而每多一張圖片,都係增加緊你成功賣出產品嘅機會。咁另外個三張應該影啲咩呀?

  1. 俾買家睇下應用嘅情況。(當你係賣緊皮鞋嘅,可以著上腳,襯返條牛仔褲,然後影翻張相)
  2. 俾買家睇下件產品嘅效能。(當你係賣搾汁機嘅,可以放啲生果入去搾,然後影下個成品)
  3. 俾買家係不同角度睇下件產品。(影件t-shirt嘅前後)

呢三張相對於買家決定買唔買件產品有非常大嘅影響,大家都想知多啲架嘛?

產品攝影秘訣五:俾買家從不同角度認識你件產品。

到最後都係個句,熟能生巧。

我好有信心你已經有能力成為Carousell嘅攝影大師。而家就攞部電話出嚟,打開Carousell個app,試下啱啱學咗嘅野,影幾張相賣下嘢啦!

不過世事又點會咁美好呀,有時可能影極都影唔好,唔緊要,因為你仲可以去執翻靚張相。就好似我地公司嘅攝影師咁講:「識執相同識影相一樣咁重要。」好彩你可以係我地個app入面執相,唔洗轉app咁煩。

見你咁有心睇到嚟呢到,就話埋俾你知點係Carousell入面執相啦。

Bonus秘訣:用Carousell嘅in-app editor執相

第一步:揀想要執個張相,然後會見到螢光幕顯示「裁剪及移位」
Tap on your photo before listing to edit your product photography
第二步:係螢光幕嘅左下方撳「編輯照片」
Where to press edit photo on Carousell to enhance your product photography
第三步:係螢光幕下方揀你要嘅工具去執靚張相
The options available on Carousell's photo editor to edit your product photography

即管試晒所有工具啦,如果唔係就唔可以張呢個咁正嘅功能發揮到極致。

我地嘅in-app editor包括以下嘅功能:

  1. 光度
  2. 曝光
  3. 色彩對比
  4. 冷暖度
  5. 飽和度
  6. 鮮艷度
  7. 陰影對比
  8. 色調
  9. 清晰度
  10. 縱向/橫向
  11. 對焦
  12. 銳利度

對我嚟講,呢啲功能對於創造一張吸引人嘅相,絕對係綽綽有餘。

所以係Carousell除咗拍賣,仲可以展現你嘅攝影技術!

呢篇blog真係好長,如果你睇到呢到我好感激你。

我希望頭先講嘅技巧可以幫到你係Carousell有一個愉快,輕鬆,成功嘅拍賣過程。每個人買嘢都係想靚想感覺好啲,所以一張靚嘅相就可以幫佢地想像你件產品有幾襯自己,真係諗下都開心。

唔好猶疑啦,即刻開始影低你想賣走嘅嘢,然後幫佢開展第二人生啦。如果仲想知多啲關於《點喺Carousell賣嘢:三步,舊愛變外快》,可以睇埋呢篇blog。

無論你有啲咩問題都可以留言話我知,亦好歡迎你張呢份秘技同朋友分享,一齊增進攝影技術啦!

Happy Carouselling!

翻譯: Bosco Cheung

LEAVE A REPLY

Please enter your comment!
Please enter your name here