Carousell最常見嘅一條問題，就係究竟應該點樣為二手物品定價。價錢實在係太重要，你同我上網買嘢，點都係買最平個件啦係咪。同埋邊有人咁傻比個百幾蚊去買件一模一樣嘅產品呢? 但係係Carousell你唔需要蝕讓或者係做最平個個先可以賣走你嘅產品，等我話你知點做啦。
首先，你去Carousell搵一件你想賣嘅嘢，睇下其他人賣緊咩價錢。你會發現有啲賣家可能賣得好平，但係依然冇人出價，可能係因為件產品狀況好差，所以平唔一定就係致勝嘅關鍵。咁究竟點樣先可以合理咁為你嘅產品定價，同時亦可以係芸芸嘅賣家之中突圍而出? 睇下下面呢張圖你就會知道定價嘅第一步：
跟住上面嘅4個原則，你就可以好好咁為你嘅二手物品定價啦。Carousell希望每個賣家都係負責任同有良心。如果你想知多啲，我會再係下面解釋個四個原則：
- 知己知彼
- 考慮需求
- 30%法則
- 產品狀況
-
知己知彼
記唔記得頭先叫你睇下其他同樣產品嘅價錢? 其實就係市場研究嘅第一步。我哋嚟睇下如果iPhone X嘅話，價錢可以差幾遠!
左面個部平$100，但係唔係最好嘅選擇呢? 賣得平往往都係一個推銷的方法，但係唔代表你嘅定價係有競爭力。所以唔一定要最平先可以賣到你嘅產品。係你定一個你會後悔嘅價錢之前，睇埋篇文先啦。
-
考慮需求
望下你要賣嘅嘢，然後諗下呢兩個問題：
需求係唔係非常之大?
係唔係非常罕有?
記住你嘅答案，然後一齊睇下下面三個個案，了解多啲關於需求同定價嘅關係啦。
個案一：
如果你兩個答案都係「係」嘅話，你絕對可以為你嘅產品定一個高嘅價錢，因為佢又罕有又多人想要。所以就算昂貴都好，想要嘅人都會買。
個案二：
如果你兩個答案都係「唔係」嘅話，你就要考慮下你自己嘅情況：如果你想快啲賣走件產品套現嘅，咁價錢就要定低啲；如果唔係，你可以定你心目中嘅價錢然後等待一個合適嘅買家。但係可能要等比較耐啦。
個案三：
咁如果需求大，但係其實市面上仲有得賣呢? iPhone就係一個好好嘅例子，啲人會係Carousell買iPhone就係希望搵到一個比市價好嘅價錢，咁所以如果你想快啲賣走啲好似iPhone咁嘅性質嘅產品，你可以定一個比較低嘅價錢，提升競爭力，如果唔急嘅，同其他賣家定個差唔多嘅價錢，橫掂好快都會有人買。
-
30%法則
好簡單，將你嘅定價，定低於市價30%。我諗冇人會肯比原價去買一件二手嘅產品，比得原價嘅點解唔去買件全新嘅呢? 所以即使你件產品好新淨，最好都係定返原價嘅70%，而如果產品嘅狀況越差，定價就自然要隨之降低。但係其實都唔係放諸四海皆準，如果件產品係高需求又罕有嘅，你絕對可以定一個較高嘅價錢。
-
產品狀況
要謹記產品嘅狀況同定價高低有密切嘅關係。需求大唔大，件產品罕唔罕有，對買家嚟講並唔重要，佢哋在意嘅係件產品有幾新淨。係Carousell你可以顯示件產品係全新定二手：
除此之外，你應該好清楚咁話比買家知你件產品嘅狀況，如果有破損嘅亦都可以透過相片去比佢哋了解。另外，0-10都係一個好好嘅方法去表示你件產品嘅狀況，0係最差，10係接近全新。
如果你有咩疑問都可以留言話我地知，我哋好樂意解答㗎。同埋記得要將呢啲貼士分享比你啲朋友呀。
Happy Carouselling!