近年無論 Apple 定 Samsung 等大牌子都每年出新機，想追新款/換新機又好似好浪費，拎去Trade in個價又被壓到好低，為咗唔想蝕錢，唔少人都會選擇喺二手平台將舊嘅手機用個好價錢賣出去，又或者賣俾手機回收專門店。不過原來好多人屋企都收埋三部或以上嘅舊手機，原來係因為唔識得清除手機上嘅個人資料，或者怕撳錯掣，而寧願放喺屋企封塵/做電子垃圾，都唔選擇拎出去賣，白白浪費咗一個賺錢嘅機會，最後仲造成浪費。

不過唔使驚！唔好以為洗機一定要專人指導，其實你都可以自己一手包辦，仲好簡單添！自己整仲安心，唔怕資料外洩啦！以下落嚟將會分別教大家喺 iPhone 同 Android 機上點樣安全徹底清除手機上嘅個人資料，同還原原廠設定，還原全新，自然賣得安心！仲送你放機小Tips！！

iPhone手機：設定>重置>清除所有內容和設定

1) 備份舊 iPhone 並登出 Apple ID、iCloud 及 iTunes、App Store

喺清除舊 iPhone 嘅資料前，切記一定一定要做好備份(back up)，將所有資料備份到自己嘅iCloud上，或者直接轉移到另一部 iPhone 上。成功轉移資料後，除了 Apple ID 外，iCloud、iTunes、App Store 等都要記得通通登出晒。一定要打醒十二分精神，如果喺未登出 Apple ID 同 iCloud嘅情況下，千祈唔好手動刪除任何資料如相片、備忘錄、聯絡人或其他喺 iCloud 上嘅資料等，因為喺未登出嘅狀態下就清除資料，就唔只喺舊 iPhone 上刪除資料，而係將成個 iCloud 嘅資料都刪除晒，唔想珍貴嘅資料冇晒，進行洗機前就一定要特別謹慎喇。

▲切記喺刪除任何資料前要登出 Apple ID 同 iCloud

2) 如果有連接 Apple Watch ，記住要同舊 iPhone 取消配對

首先喺舊 iPhone 上開啟 Apple Watch App，再前往「我的手錶」，再按「所有 Apple Watch」，然後再按一下手錶旁嘅資訊按鈕，最後按一下「取消配對 Apple Watch」，或有需要輸入 Apple ID 密碼作確認。

▲除咗 iPhone 本身，記得仲要周邊裝置取消配對

3) 清除所有舊 iPhone 上的內容和設定

▲進入「設定」之後，選擇「一般」選項。喺頁面最底下可以搵到「轉移或重設 iPhone 」。

▲然後揀選「清除所有內容和設定」，再撳「繼續」，最後輸入密碼，就正式開始洗機喇！

4) 移除信任裝置

恭喜你，嚟到呢步你部舊 iPhone 嘅資料正式清洗得一乾二淨！不過仲有最最最後一步，就係將你部舊 iPhone 從你嘅 Apple ID 中移除信任裝置。只要喺你嘅新 iPhone 上撳「設定」>>「姓名」，點選舊 iPhone 裝置名稱，並將佢從信任裝置列表中移除，咁就大功告成！可以拎去賣喇！
(⬇碌落下面仲有放機小Tips⬇)

Android手機：重設為原廠設定

1) 確保手機資料完全備份

喺洗機前，一定要確認所有資料已經完成好備份，Android 手機一般使用 Google 帳戶備份或同步資料，或者將資料搬到 SD card 或電腦上，確保儲存喺裝置記憶體嘅資料都有備份。安全起見，如果手機配有 SD card 請喺重設前將 SD card 拔出。

2) 直接重置手機並清除資料

( Android 手機牌子眾多，以下將會以 Samsung 作為例子)
重設為原廠設定會刪除手機入面所有資料，包括 Google 帳戶、設定、媒體、相片、應用程式等。

▲喺「設定」入面搵到「一般管理」，再按「重設」

▲再按「重設為原廠設定」>>「重設」>>輸入密碼及再次確認

3) 完成

恭喜你，嚟到呢步你部舊 Android 手機上嘅資料正式清洗得一乾二淨！可以上網搵買家接手喇！

賣二手電話小Tips

將舊手機放上網賣，就梗係想盡量賣到個好價錢啦，以下幾招或者對你有啲幫助⬇⬇⬇⬇⬇

1) 幫部舊手機影輯靚相
影相前先將手機清潔乾淨，影相時盡量將部手機放喺整潔嘅平面上，喺光線充足嘅環境下以多角度拍照，讓買家可以360度睇清楚你部手機，整潔嘅背景亦可給予買家一個好印象。

2) 盡量寫清楚所有資訊
詳細嘅資料同說明有助買家更直接了解你嘅商品，例如喺標題清楚例明手機型號、顏色、容量等重要資訊。喺商品說明入面例出詳細資料如：使用年期、電池健康度、是否附送其他配件、是否含有隱藏問題、或其他額外資訊等。

3) 先喺平台上參考市價
刊登你嘅商品前，可以喺 Carousell 上搜尋同款產品，睇下其他賣家一般開價幾多，作個參考，咁就唔怕賣得太平而覺得唔抵；或者set得太高價而無人問津啦！

4) 善用推廣工具
如果你想盡快賣出你嘅舊手機，不妨考慮下喺 Carousell 上使用泵(bumps)或熱門推廣(spotlight)，適當地運用推廣工具可以令你嘅商品獲得更多曝光率，呈現到更多買家眼前，多咗人睇到你嘅商品，有人買嘅機會自然大啲啦！

>>>即到 Carousell 參考或開始出售你嘅舊手機