撰寫產品介紹:三個秘訣,擄獲買家嘅心

0
1409

係Carousell入面,咩事都可以發生。最理想就梗係你擺咗件產品上Carousell,然後一個有興趣嘅買家撳咗「出價」,你順利賣出件產品,安排好俾錢同交收,對方俾個好嘅評價你,大家從此開心快樂咁生活落去。

但係事實上,好多賣家都唔知道寫一個好嘅產品介紹有幾重要。

你擺咗件產品上嚟,但係啲人好快就碌走咗,最後幫襯咗另一個賣家,點解會咁呢?

好可能因為你無寫到一個詳盡嘅產品介紹 (包括尺寸、顏色同點解要賣)。人地想買但係乜都唔知,咁點買得落手呢。

咁你想好似第一個情況咁理想? 定係想同其他唔在乎產品介紹嘅賣家一樣?

所以睇完呢篇文,你就會知道點樣寫到一個吸引人嘅產品介紹啦。

寫個吸引嘅產品介紹

買嘢嘅人好多時都會心大心細。一個好嘅產品介紹可以令到佢地更加肯定買野嘅決定。產品介紹唔單止介紹件產品,更加俾充足嘅資訊啲買家,令佢地知道你件產品是最好的。

係呢篇文入面我會同大家講吓:

  1. 點寫個好嘅標題
  2. 產品介紹一定要有啲咩資訊
  3. 點寫一篇可以連繫你同買家嘅產品介紹

如果你嘅產品介紹令買家好輕易就做到決定嘅,你自然都可以好輕易賣出件產品啦。

  1. 點寫個好嘅標題

首先,我想你試吓做一樣野。

去Carousell,搵一件你想買嘅嘢,留意下佢個名同介紹,有冇發現有啲產品個名會出唔晒? 為咗一個整潔易用嘅介面,我地會限制咗產品名稱嘅字數,好似咁樣:

How product titles get cut off if its too long on Carousell

試想像你係Carousell買嘢要二選一,兩件產品睇相都係咁靚,但係最後都係會揀個名清晰啲個嗰。

呢個就係第一個秘訣!

如果產品名稱太誇張太多嘢,買家就未必會想去研究你究竟賣緊啲咩,然後就會碌走。

個名一定要短同精簡,我會建議淨係放最相關嘅字詞入去。當你想賣咗部電視,個名就應該包括佢嘅牌子、尺寸同種類 (例:Panasonic 40″ Smart LED TV)。

你仲可以用啲簡寫去簡化產品名稱。係Carousell常用嘅簡寫有呢啲:
BNWT:全新連牌 (Brand New With Tag)
BNIB:全新未拆盒 (Brand New In Bag/Box)
NWT:新淨連牌 (New With Tag)
NWOT:新淨無盒 (New Without Tag)
WTS:想賣 (Want to Sell)
WTB:想買 (Want to Buy)

進階要訣:產品名稱唔好不停重複唔關事嘅字,咁樣可能會令買家覺得煩而唔買你嘅產品。

下一個秘訣,就係究竟買家想係產品介紹入面搵到啲咩資訊。等你唔會再成日收到多餘嘅問題。

  1. 產品介紹不可或缺嘅資訊

等我分享一個經歷你聽,你就會知道詳細嘅資訊係有幾重要。

有一日我係Carousell想買條裙,根據我睇相嘅時候嘅第一印象,同埋佢地精簡嘅產品名稱,我揀咗兩條。而家我要二揀一,就唯有去睇下佢地嘅產品介紹。

第一條個描述係咁嘅:

How you should avoid giving brief product description on Carousell and give more details instead

第二條個描述係咁嘅:

How you should describe your product description in detail on Carousell

估下我最後揀咗邊條? 冇錯啦我揀咗第二條。

因為第一條佢淨係講咗個尺寸,我完全唔知條裙嘅牌子、顏色同質地,結果我又要花時間去問個賣家。
但係對於第二條裙我基本上無任何問題,我要知嘅都已經清清楚楚寫晒係產品介紹,我要做嘅只係出價,就可以買到心頭好。所以個秘訣就係寫得越詳盡越好。寫多啲嘢會花多咗時間,但係你幫緊啲買家慳返問問題同等答案嘅時間。

通常買家都會希望係產品介紹入面搵到呢啲嘢:

牌子

牌子一定要有,特別係名牌。諗下啲買家見到自己鍾意嘅牌子會有幾開心?

進階要訣:如果你係售賣高級名牌,記得留返張單,因為買家好多時都會想你俾單佢地睇,去證明件產品嘅真偽。

產品狀況

如果你唔話俾人知件產品新唔新淨,而張相又影得唔清楚,好多時候啲人就會嚟問你呢樣嘢。同埋定價合唔合理,好多時都係睇下件產品有幾新淨。

我地之前都有講過應該點樣定價,如果未睇過就撳去呢到睇下啦!

咁仲有咩要話俾買家知呢? 其實基本上係所有嘢,包括:

你用過幾多次件產品?幾時買?仲有無保養?有無爛或者花?

最簡單嘅方法就係用1-10嚟表達,1分最差10分最好。

質地同規格

如果件產品係着得上身嘅,買家會想知道係咩物料做。有啲人會因為敏感而好注意啲衫嘅物料。所以我們都要做個負責任嘅賣家,搞到人地周身痕就唔好啦。

如果你係賣緊電子產品嘅話,買家就會想知道產品嘅規格。

尺寸

睇相有時真係好難知道件產品有幾大,咁所以我會建議提供產品嘅長闊高。其中一張產品照片亦可以將件產品同日常物件做比較,等買家可以有個參考。

越多資訊就越能夠幫買家做決定。

進階要訣:呢個只係一個好籠統嘅指引,唔係樣樣嘢都適用,不過唔怕,我地個app會引導你寫一個好嘅產品介紹㗎。

嚟到最後一個秘訣啦喎,就係點樣連繫起你件產品同個買家。

  1. 點寫一篇扣人心弦嘅產品介紹

當每個係Carousell賣嘢嘅人都睇咗呢篇文,知道晒啲秘訣,咁仲可以做啲咩去令到買家揀你而唔揀其他人呢?

要嘅,係一個獨特嘅故事。

放心,我唔係話要寫篇一千字嘅文。不過如果你件產品有啲咩得意嘅故事或者經歷,不妨話俾大家知呀。

如果你件產品係有故事,買家好容易就會投放情感落去。無故事都唔緊要,你可以講下點解會賣呢樣嘢,好似…點解我會着唔落條牛仔褲…咁囉。

雖然價格係一個好重要嘅因素,影響買家買唔買你件產品,但係同時間件產品嘅故事都好有影響力。

呢個Carousell賣家想賣走佢前女友張櫈,好得意㗎我地一齊嚟睇下:

How a memorable product description can convince buyers to buy your used item

係咪令你印象深刻呢?

咁所以最後呢個秘訣就係要獨特。俾其他人知道你件產品嘅經歷同埋點解佢需要一個新嘅主人。

寫一個令人印象深刻嘅產品介紹可以吸引更多買家。

我地每個人都做過買家。所以當我地化身成賣家嘅時候,應該問下自己,當我上網買嘢嘅時候,我想知道啲咩產品細節呢? 咁你就會知道其他人想要啲咩啦。

記住,令到買家容易做決定,就可以更加容易賣走你件產品。

如果你有friend想知多啲點寫一個好嘅產品介紹,記得叫佢嚟睇下呢篇文呀,同埋無論有啲咩問題都可以留言話我知㗎!

Happy Carouselling!

翻譯: Bosco Cheung

LEAVE A REPLY

Please enter your comment!
Please enter your name here