今時今日嘅時裝界潮流幾乎日日都變緊，要緊貼潮流都真係好易搞到荷包乾涸，因為好多單品如果等到減價先入手，到時就已經變OUT。如果大家想做時尚達人，又唔想成日大出血，咁就要學識改造舊衣物喇。Carousell嘅時裝專家整理左足足11個貼士，教大家點樣將舊衫同飾物大升級！
貼士一：牛仔配喱士
第一招十分簡單。只要從舊衫剪走條喱士，跟住車一車佢防止甩線，再搵衣物膠水痴落牛仔單品就搞掂喇！大家不妨試下玩下唔同嘅款式同顏色嘅喱士，如果想有女人味啲，亦可以揀柔和嘅粉色同者白色。擺喱士落牛仔短褲褲腳同衫袋邊亦都係好好睇嘅選擇。
貼士二：閃令令靚爆鏡
大家可以用以前視藝堂淨低嘅五顏六色閃片絲帶，用少少衣物膠水佢痴落平平無奇嘅淨色Ｔ恤。又或者你可以用絲帶嚟拼字，甚至係金句，咁就可以令件衫更加有個性。
貼士三： 衣服當畫布
只要有支衣物畫筆，大家都可以發揮小宇宙，喺舊衫、舊褲畫上你想中意嘅嘢。畫畫唔叻唔緊要，可以用張模紙印住畫，又或者用喱士印住都得，之後油上顏色就搞掂喇。只要搵到適合個人風格嘅圖案，舊衫就會即時變得好有特色，有靚衫著之餘仲好好玩！
貼士四：型格窩釘
唔係淨係搖滾歌星先中意窩釘架！平時我哋都可以將窩釘同其他金屬飾物放上衣物。如果大家有啲舊手鏈同頸鏈，可以拆個飾物出嚟，用較剪喺舊衫剪開個窿仔，再穿上個飾物，打個結就完成喇。有剩嘅仲可以用嚟整頭飾𠻹。
貼士五：漂染變色
大家細個嘅時候有冇用過海綿染衫呢？又或者有冇玩過印仔？只要有一支漂白水同埋染劑，大家都可以自己為衣物染上唔同顏色，仲可以整好多圖案㖭！染色或者漂白之前，記住先用唔同布料做下實驗，試下效果先呀。
貼士六：左加右襯
鍾意fashion嘅人都知道，識襯衫同襯飾物比買一大堆衫更重要。所以呢，屋企點都有好多易襯嘅基本款坐鎮，只要識襯飾物，你個look就可以煥然一新架喇，咁就唔洗成日換款啦。
貼士七：活用牛仔褲
每個人衣櫃都總會有幾條唔啱身又唔捨得扔嘅牛仔褲。既然擺喺度封塵，不如將佢變成手袋仔？只要有較剪同衣物膠水，加埋上面用淨嘅閃閃絲帶同窩釘，咁就可以自製成個名牌咁嘅手袋仔啦。
貼士八：舊衫變頸巾
舊冷衫縮咗水，唔再啱著？不如剪佢落嚟變做頸巾啦！如果想多幾種顏色，仲可以將唔同冷衫嘅部份車埋一齊𠻹。穩陣啲可以用黑、白、灰呢啲大路顏色做底色，再加其他圖案，好簡單就可以整出最有特色嘅頸巾，冬天襯衫都唔會咁悶啦。
貼士九：人字拖大變身
市面上啲五顏六色嘅人字拖賣到成百蚊咁貴，不如自己將對幾十蚊嘅拖鞋升級啦！只要將舊披巾嘅靚圖案剪成一條條，綁去人字拖嘅「人字」位，再打個結就得喇。又好睇又冇咁易挖腳，係咪快靚正呢？想再升級嘅話，仲可以綁到上腳腕，人字拖即時搖身一變，變成綁帶涼鞋！
貼士十：留住百搭基本款
買新衫添戰衣之前，不如寵幸下現有嘅衫褲先？一件好簡單嘅淨色T恤，其實已經有好多配搭。平時休閒look又得，襯條sharp醒leggings又得，加件型格皮嬲都唔錯架！夜晚約咗人食飯？不妨襯條誇張頸鏈啦。再唔係嘅話，加條皮帶都可以令個look升級唔少。
貼士十一：閃閃頭飾
唔係淨係你條頸先可以閃閃發光嘅，其實平時好少戴嘅頸鏈都可以擺落個頭架。頭飾嘅感覺仲更加華麗同摩登𠻹。平時戴嘅話，可以揀條輕身同埋可以教長短嘅頸鏈。特別日子就可以揀條隆重啲嘅款式，仲可以襯埋唔同嘅髮型，例如係高髻。
講到尾，只要你肯放手一試，發揮創意，花錢買新衫前睇下衣櫃有咩可以升級，結果真係可以好有驚喜架。橫掂擺喺度都係篤眼篤鼻，不如俾啲舊衫舊飾物一個機會？想行出第一步，可以先將舊衫分類，睇下邊啲可以加工，邊啲拎去剪，邊啲飾物會改造，由簡單嘅步驟開始試，好快就會有信心大膽實驗架喇。
衣物有得升值，戶口又唔洗減值，係咪試等過先？
