八樣最意想不到的值錢舊物

0
1791

每個人屋企都總會有堆唔捨得扔,又估唔到有人會肯出錢買嘅嘢!其實,有啲野我地明明洗左錢買番黎,但又總係唔會用。與其硬係要擺佢地喺櫃筒封塵,有冇諗過可能其他人會用得著?

其實,有好多長駐喺你屋企不見天日嘅嘢,都會喺網上搵到人寵幸架,秘訣就係要合理定價喇。你當係草嘅嘢,其他人可能當佢係寶!二手買賣市場其實比好多人想像中蓬勃得多。雖然二手貨品未必可以以原價賣出,但都絕對可以賺到啲外快幫補下。當你打算大掃除扔走啲「無謂野」之前,停一停、睇一睇下面個list,發掘下有冇呢8大估唔到有人會出錢買嘅嘢啦!

1. 二手衫褲、復古時裝

好多人衣櫃都有一大堆好少著,甚至係未著過嘅衫。呢堆衫可能包括一啲唔再岩著嘅牛仔褲,或者係淨係著過一兩次嘅碎花裙。與其擺係到都係哂,不如擺佢上網睇下有冇人岩心水?成個步驟簡單快捷,包你識用。

就好似下面呢件棒球嬲咁,可能你前幾年見佢好興買完著左一兩次就算,但對於熱愛運動裝嘅人黎講,話唔定佢地會一見鍾情!

null

2. 健康美容產品

有冇試過交換禮物收到支潤膚露或者香水,但味道又完全唔岩自己心水?見係親朋好友一番好意,收禮物時點都要笑住口話好中意,但心入面一早就知自己實唔會用,真係恨不得佢地折現送現金呀!

其實,呢啲唔岩心水嘅嘢唔洗收埋一邊嘅。你可以擺佢上網幫佢另覓主人,順便賺番幾個錢!好多全新或者冇乜用過嘅香水、身體護理同護膚品都好受買家歡迎,事關佢地一定比專門店價錢平一大截。而且,就連浸浴球同頭髮造型器都大有市場架 。

null

3. 室內外傢具

有冇諗過,傢具係網上容易賣出嘅貨品呢?因為傢具通常壽命較長,只要保養得宜,即使用過都會好靚仔!例如,賣家可能有張真皮梳化,又有用開皮革抛光膏打理,坐左幾年後想換款,所以就擺上網賣走佢。即使係用過,打理得好嘅傢俬其實都仲係質素好高架,上網買嘅仲實比傢俬鋪平得多!

大家如果品味改變左,或者要裝修屋企,有啲要換嘅枱櫈、床頭櫃同茶几,可能擺上網就會搵到買家接手佢地架喇!除左大型傢具,DIY器材同衣架都有人有興趣買架。

null

4. 科技電子品、電線

唔少人中意買最新最潮嘅科技同電子產品,但其實都有好多買家中意上網發掘一啲平價電子玩意。無論係iPad、MacBook、NDS定係喇叭同航拍機,基本上你屋企有咩電子產品都可以賣得出。就算係好舊款嘅產品,都可能會有人買黎做道具或者小朋友玩具架。只要產品操作正常,定價合理,話都冇咁快就會有人買走呀!如果你手上有復古或者絕版型號(如下圖iPod),就更加分啦!

提提大家,買家可能會對產品有技術上嘅疑問,只要一早提供詳細嘅說明,咁就唔洗煩喇。

null

5. 古董陶器

婆婆傳左套懷舊茶具套裝俾你,好日都唔用一次封哂塵?屋企有啲擺設,睇落似值成千上萬?上網做下功課啦,話唔定真係會賣到個好價錢架。好多人都會金睛火眼,上網𥄫實有冇古董陶器、花樽擺設買。

作為賣家,最緊要就係做好資料搜集。如果真係覺得自己手頭上有件罕有珍貴嘅古董,先揾專人同你做鑒定同估價先好賣出去。呢幾年古董物品十分渴市,多得班潮人令好多舊玩意都重新興番,只要手上拎住真品,你啲古玩分分鐘可以幫你賺番筆!

null

6. 遊戲機碟、主機手掣

想汁個靚位擺新嘅遊戲機?有班狂熱機迷等住喺網上買走你用過嘅遊戲機碟,尤其係而家好難搵嘅舊版同限量版game!好多人都話,電玩係永遠都唔會過時,即係話你可以放心,你啲舊遊戲機同碟都實會賣得出,就好似近年喺二手市場復興嘅舊式任天堂遊戲卡帶,網上大受歡迎!

記住喺產品描述到寫上「復古」而唔係「舊/已用」等字眼,咁你件貨就吸引得多。如果貨品十分新淨,原裝齊盒,咁就切記要好似以下賣家咁,大大隻字特別標明喇。

null

7. 書籍文具

熱愛閱讀嘅人好多時都中意買舊書。好簡單,因為唔止平,又易啲搵到唔再出版嘅書,而且仲好環保添!如果你有好多睇過無數次嘅書,想騰出書櫃嘅空位放新書,咁就記住放堆舊書上網賣喇,包你賺到個錢!如果你有啲特別版、簽名書或者好難搵嘅書,就實會賣到更好價錢喇,好多人中意買黎儲齊一套架。如果唔確定自己屋企啲書值唔值錢,咁就記住唔好咁衝動捐左去或者送俾人,留意一下本書名同作者啦,咪等扔左先黎後悔呀!

除此之外,未用過嘅文具喺網上都好搶手,就好似下圖嘅遊記簿。其實好多人都中意收藏文具架。

null

8. 手作

無論你係全職藝術家,定係純粹中意用空餘時間整下嘢,但又從來冇諗過拎去賣,其實網上可能會有人欣賞你嘅作品架。如果你有天份,好似Carousell咁嘅網上買賣平台都有好多人可能有興趣買你嘅產品。好多人都中意買獨一無二嘅原創品,同個artist傾下計,話唔定會有人欣賞你嘅作品顏色、構思。無論如何,各花入各眼,可能你會發現自己嘅作品會大受歡迎架。

null

坐言起行 開始汁屋

千其唔好睇小屋企周圍睇唔起眼嘅嘢,老套啲都要重複一次,你當係草嘅嘢,其他人可能當佢係寶!禮拜日喺屋企汁下嘢,將你用唔著嘅嘢一次過影張相擺上網賣啦,真係話都冇咁易呀!

LEAVE A REPLY

Please enter your comment!
Please enter your name here